Steinsprang skapar uro
– Det rasar ned stein som me ikkje har kontroll på.
Det skreiv Harald Kaldestad, styreleiar i Sjoaskår sameige, til Kvam herad i mars 2023. På vegner av sameiget informerte han om ei fjellskjering mot naboen, som sameiget meiner ikkje er reinska skikkeleg etter sprenging.
Dette er farleg for gjestene som er på besøk. Gjester parkerer i området, står det i e-posten. Ifylgje sameiget ligg det dessutan større, ustabile blokker på toppen av skjeringa.
Framleis er det ikkje gjort noko med blokkene.
– Ikkje vår eigedom
Kommunegeolog Tore Dolvik var på synfaring på staden i mars i fjor, like etter at meldinga kom, men over ein månad seinare hadde sameiget framleis ikkje fått tilbakemelding. I ei purring 24. april skreiv Kaldestad at det sidan synfaringa hadde rasa ut jordmassar under den største blokka i området, og at det er uvisst kva blokka heng etter. Det ser dårleg ut dersom det er jordmassar under blokka, står det i purringa.
I mai 2023 fekk sameiget eit notat frå synfaringa. Der skriv kommunegeologen at dersom det ikkje vert gjort tiltak, vil koma meir nedfall av stein og lausmassar i området. Ei grøft nær skjeringa, som er stor nok til å ta i mot nedfall, hadde vore ein føremon. Det gjeld langs heile skjeringa og ikkje berre område som allereie har hatt mykje nedfall, skreiv Dolvik.
Han utelukka heller ikkje større nedfall enn det som hadde kome ned til då. Det bør òg vurderast om ytterlegare tiltak enn ei grøft er naudsynt for å hindra skade, skreiv han.
– Fjellsida det rasar frå, ligg ikkje innanfor vår eigedom, så det vert feil at me skal ta imot dette som kjem ned, svara Kaldestad.
Ifylgje notatet frå synfaringa ligg mesteparten av nedfallet innanfor ein radius på éin meter inne ved skråninga.
Kven sitt ansvar?
Det er dei som kan verta råka eller skada av skredfaren, som har ansvar for sikra sin eigedom, ifylgje Dolvik. Om det er gjort eit tiltak, som ei sprengd skjering, så er tiltakshavar ansvarleg, skriv han til sameiget.
I slutten av januar i år opplyste Kaldestad til Dolvik at GBS Entreprenør AS, som var utførande entreprenør for grunnarbeidet på tomta, har reinska skjeringa. Sikring av steinblokker ynskte ikkje verksemda å gjera noko med. I e-posten ber han Kvam herad om å sjå på blokkene.
– Det er tydelege sprekkar fleire plassar i fjellet, så dette burde ha vore bolta fast, skriv Kaldestad.
Ei ny synfaring fann stad i april. I juni i år etterlyste Kaldestad ein uttale, og 5. juli kom svaret. Det skriv kommunegeologen at han rår å laga til permanent sikring av fjellskjeringa. Reinsk, som er gjennomført, kan vere greitt ei stund, men det løyser ikkje problemet på lang sikt, meiner han.
HF har vore i kontakt med Kaldestad, som ikkje ynskjer å kommentera saka.
