Steinskred stengjer veg
Fylkesveg 576 vart stengd ved Nes mellom Mundheim og Oma torsdag morgon. Ein personbil køyrde inn i skredet, men ingen vart skadd.
Bilføraren var åleine i bilen. Han fortel til HF at han kom køyrande like etter raset hadde gått, og at han ikkje klarte å stansa tidsnok.
Meldinga om skredet i Teiglandsberget kom frå Vegtrafikksentralen på Twitter klokka 06.18.
– Oppryddinga byrjar ikkje før det vert lyst, sa trafikkoperatør Stian Hodnekvam i Vegtrafikksentralen torsdag morgon.
Kor lang tid det ville ta, var vanskeleg å seia. Då lyset kom, viste det seg at det er skadar på vegen som krev utbetring. Litt før klokka 14 melde Vegtrafikksentralen at vegen kan opna att tidlegast fredag ettermiddag. Det vart bestemt etter at ein geolog hadde vurdert skredstaden.
Ifylgje Kvam herad må terrenget over vegen reinskast, og det er dessutan trong for masseutskifting i vegfundamentet.
Sjå video av skredområdet her:
