– Stein nyttig på Bjørkheim

Det spørsmålet vil ikkje kommunestyret i Samnanger kommune ha svar på. Torsdag røysta nemleg eit fleirtal på 11 mot 9 ned framlegget i ein interpellasjon frå tidlegare ordførar Knut Harald Frøland (Bygdelista). Han føreslo å be rådmannen vurdera enkelt kor store areal langs fylkesvegen på Bjørkheim ein kan «skapa» med steinmassar frå tunnelen.

Bakgrunnen for saka er at Frøland vil hindra store deponi i Eikedalen, som er mellom alternativa fylkeskommunen vurderer, og at Bjørkheim sentrum er i utvikling. Ikkje minst opnar Vinmonopolet nytt utsal der i vår, noko som kan auka omsetninga i området og gjera det attraktivt for andre aktørar, meiner Frøland.

Han ser føre seg å utvida sentrum på sørsida av fylkesvegen, der dagens sentrum ligg, med hjelp av utfylling i sjøen i retning mot Reistad.

– Gjort på rette måten kan det gje eit stort lyft til området og syrgja for ei fornuftig sentrumsutvikling, skriv Frøland i interpellasjonen.

Ordførar Karl Kollbotn (Frp) argumenterte og røysta mot framlegget frå Frøland. Han meiner ikkje det er rett med meir utfylling ved Bjørkheim, men ville ha støtta framlegget om vurderinga ikkje omfatta berre dette området.

Frøland minte om at det berre er snakk om å vurdera alternativet, og hinta om at han kjem til å ta opp att saka seinare. Han meiner Samnanger snarast mogeleg må melda seg på i kampen om ein samfunnsnyttig bruk av steinmassane.