Statsråd på fjøsbesøk

Statsråden var innom fleire stader måndag. Ho kom frå Norheimsund, og reiste vidare til Odda etter gardsbesøket på Torsnes. På Torsnes hadde fleire samla seg for å høyra kva Larsgard hadde å fortelja om livet som bonde.

– Eg representerer den alminnelege vestlandsbonden, sa Larsgard.

Investerte for framtida

Larsgard fortel at han og Galtung har vore i samdrift i kring tjue år. I byrjinga hadde dei éin fjøs kvar. Mjølkekyrne var i Galtung sin fjøs, medan dei unge kyrne var hjå Larsgard.

Etter kvart innsåg Larsgard og Galtung at dei måtte tilpassa seg til framtida. Difor vart fjøsen til Galtung renovert og oppgradert til lausdriftsfjøs i 2014.

– Eg kjenner meg heldig som har fått lausdriftsfjøs, seier Galtung.

Tidlegare hadde Larsgard og Galtung 15 mjølkekyr som produserte 70.000 liter mjølk for året. No har bøndene 30 kyr som produserer 220.000 liter mjølk i året. Det vil seia at omsetninga har meir enn tredobla seg, fortel Larsgard.

I 2023 kjøpte Larsgard og Galtung mjølkerobot. No er dei ikkje like bundne til å vera i fjøsen som dei var før. Dei får også meir kontroll over produksjonen og tilstanden til kyrne, fortel Larsgard.

Roboten er kopla til ein app. Larsgard og Galtung kan bruka appen til å sjå kva for ei ku som har vore innom mjølkeroboten. Bøndene kan også sjå på dei analyserte tala roboten gjev dei, seier Larsgard.

– Det gjer det meir spanande og fagleg utfordrande å vera bonde når ein har den nyaste teknologien, sa Larsgard.

Bondeduoen tok med seg Toppe og dei frammøtte på ei omvising. Toppe fekk mellom anna sjå vassmadrassane som bøndene har kjøpt inn til kyrne. Galtung fortel at alle kubåsane har vassmadrass.

– Komforten til kyrne er viktig. Å investera i dette var ikkje eit tungt val, seier Galtung.

Då Toppe fekk sjå kva mjølkeroboten kan utretta, la ho merke til ei endring.

– Kua mjølkar meir når eg ser på, fortel Toppe og ler.

– Må halda trykket oppe

Galtung håpar at regjeringa kjem til å halda fram med å satsa på jordbruket. Han meiner at støtteordningane til bøndene må halda fram.

– Det er viktig at dei som vil inn og satsa på mjølkeproduksjon, får stønad til å gjere det. Me treng eit produksjonsmiljø, understrekar Galtung.

Larsgard håpar at statsråden og regjeringa ser verdien av at nokon har lyst til å produsera mat i distriktet. Han påpeikar at små driftseiningar i landbruket framleis har stor verdi, og at det er viktig å sikra gode politisk vilkår for bøndene.

Larsgard seier at stortingsmeldinga for landbruket bør verta fylgd opp, uansett kven som sit i regjering. Han meiner at meldinga bør forplikta til handling.

– Det er éin ting å ha ei ambisiøs og god landbruksmelding. Ein annan ting er å fylgja henne opp, understrekar Larsgard.

Larsgard fortalde at færre bønder leverer mjølk. Toppe påpeika at færre mjølkeprodusentar er ein nasjonal trend.

Statsråden framheva at lokalprodusert mat, særleg for beredskap, er viktig.

– Me kan ikkje ta for gjeve at me kan importera alt me treng, seier Toppe.