Statsråd i Kvam: Sette priskutt og arbeidskvardagen på dagsordenen

I reisefylgjet hadde Toppe (Sp) med seg ordførar Torgeir Næss (Ap), barnehageleiar Ingunn Mo i Kvam herad, og partifellane Nils T. Bjørke (Sp), Johanne Neteland (Sp) og Maren Grøthe (Sp).

I Strandebarm barnehage vart politikarane tekne imot av Helena Bru og Marit Linga, som er tilsette i barnehagen. Bru er pedagogisk leiar. Linga er styrar. Barnehagen har fire avdelingar og kapasitet til 60 barn i året, fortalde Linga. I år er kapasiteten fullt utnytta for fyrste gong, påpeika Linga. Årsaka er auka tilflytting til Strandebarm i vår og sommar, sa Linga.

Nøgde med prisendring

Helena Bru er nøgd med prisreduksjonen for barnehageplass. Bru påpeika at dette kan ha mykje å seia for økonomien til familiar som har fleire barn i barnehagen. Føresette kan òg få betre moglegheit til å jobba deltid, sa Bru. Bru trur redusert pris i barnehagen kan medverka til at fødselstala går opp, noko regjeringa har påpeika er viktig for samfunnet, presiserte Bru, som sjølv er Sp-representant.

Å redusera maksprisen for barnehageplass per månad til 2.000 kroner var ei gjennomtenkt satsing frå Sp, fortalde Toppe. Ho påpeika at det er viktig at barn har tilgang og moglegheit til å gå i barnehagen. Økonomi skal ikkje vera eit hinder for barnehageplass, påpeika statsråden. Toppe presiserte at pris er avgjerande i ei tid der prisane stig. Statsråden vonar at reduksjon i pris kan medverka til at fleire unge vaksne får barn.

Kuttet i maksprisen skal finansierast ved å nytta skatt- og avgiftsposten, sa Toppe.

Utfordringar med rekruttering

I Strandebarm barnehage spurde stortingsrepresentant Nils T. Bjørke korleis rekruttering av tilsette i barnehagane går føre seg. Ingunn Mo fortalde at det har vore krevjande med tilsetjing og det å ha optimal drift ved sjukefråvær. Mange tilsette vert emosjonelt utslitne og søkjer seg til andre yrke, fortalde Mo. Barnehageleiaren sa at sjukefråvær og manglande bemanning går ut over dei tilsette som er på jobb. Dei tilsette kan ha krevjande arbeidsdagar, påpeika Mo.

Bru fortalde engasjert om arbeidsdagen sin, som rommar både opp- og nedturar. Bru fortalde om gleda av å nytta arbeidstida si saman med barna. Men Bru påpeika også utfordringar i form av tidstjuvar, møte, sjukefråvær og lite bemanning. Det medfører mindre tid til barna. Dei tilsette på jobb lyt yta ekstra og kompensera for at dei er for få, og då vert det ekstra krevjande arbeidsdagar, påpeika Bru.

Ho understreka kor viktig det er å gje føresette og barna eit trygt og godt tilbod i alle dei timane barna er i barnehagen. Rutinane bør fungera slik at ein ikkje slit seg ut og at ein klarar å stå i yrket, ifylgje Bru.

Mo påpeika at tiltak er sette i verk for å betra arbeidsmiljøet for dei tilsette i barnehagen. Kvam herad har nytta tilskot frå Kommunal Landspensjonskasse (KLP) til å oppretta prosjektgrupper med formål om å styrkja arbeidsmiljøet og kommunikasjonen. Heradet har òg lagt meir vekt på å nytta dei tillitsvalde på arbeidsplassane, fortalde Mo.

Kvam herad har tidlegare sett i gang tiltak for å auka rekrutteringa til yrket, påpeika Mo. Ho viste til stipendordninga. Kvalifiserte pedagogar som takka ja til stillingar i Ålvik eller Strandebarm barnehage, fekk 30.000 kroner i stipend, fortalde Mo. Målet var å auka rekrutteringa og sikra kvalifiserte pedagogar til stillingane. Ho påpeika at ordninga fungerte godt i begge barnehagane.

Kvam herad har framleis stipendordning for studentar, påpeika Torgeir Næss. Ordføraren vonar at folk vil nytta ordninga, og at den kan medverka til at fleire søkjer seg til barnehagelærarutdanninga.

Positiv statsråd

Kjersti Toppe lytta og var i dialog med dei tilsette, Næss og Mo om barnehageyrket. Statsråden skrytte av korleis dei tilsette legg opp til ein leiken kvardag for barna, og påpeika at barna bør leika så lenge som mogeleg. Vidare presiserte Toppe at samarbeid og kommunikasjon mellom barnehagane er viktig. Statsråden rosa heradet sitt pågåande arbeid med å forbetra rutinane.

Toppe påpeika at Sp arbeider for løysingar som bidreg til auka rekruttering for barnehagelærarutdanninga. Blant anna arbeider partiet for å få på plass tilbod om desentralisert utdanning, slik at utdanninga kan appellera til fleire.

Toppe ynskjer at god kommuneøkonomi skal bidra til auka bemanning i barnehagane. Då kan ein hindra at dei tilsette slit seg ut, påpeika ho. Statsråden sa at auka bemanning kan resultera i mindre sjukefråvær og vikarbruk. Statsråden la til at utfordringane til barnehageyrket gjeld heile landet, og at det kjem til å ta tid før organiseringa rundt yrket vert ideell.