Statsforvaltaren vil stogge gondolprosjekt for å verne villreinen
Statsforvaltaren vil stoppe gondolbaneprosjektet i Odda, fordi stasjonen på fjelltoppen kan øydeleggje for villreinstammen på Hardangervidda.
- Hardanger Lift set nasjonale interesser knytt til villreinen sine arealbehov og dei økologiske funksjonskrava til leveområda for villreinen som nasjonal ansvarsart, vesentleg til side, skriv Statsforvaltaren.
Både Hardanger Folkeblad og Bondebladet har omtalt saka.
Reidar Borgstrøm i Ås er ein av mange som har engasjert seg i arbeidet mot gondolbanen.
– Villrein, generelt naturomsyn og private grunneigarar som er imot, burde vere nok til at ordføraren ikkje gjekk vidare med saka, seier Reidar Borgstrøm, som er professor emeritus ved NMBU til Bondebladet.
– Ordføraren er sjølvsagt i sin fulle rett til å forsøke å presse Statsforvaltaren til å snu, men samstundes burde han også innsjå at eit endra vedtak vil vere på kostnad av villrein og naturmangfald, slik Statsforvaltaren har peika på. Som nasjonalparkkommune burde Ullensvang heller ha lagt dette til grunn, og framheva at kommunen er eit fyrtårn i naturvernsamanheng, der forvaltinga burde leggjast opp slik at nasjonalparkane Folgefonna og Hardangervidda kunne overleverast intakte til komande generasjonar, seier Borgstrøm.
(©NPK)
