Statsforvaltaren i Vestland førebur regional koronaforskrift

Statsforvaltaren i Vestland har sett i gang arbeidet med eit forslag til regional koronaforskrift, etter at det er påvist omikronsmitte i Øygarden kommune.

Torsdag var Statsforvaltaren i møte med mellom anna Øygarden og kommunane rundt, for å diskutere eventuelle innstrammingar i koronatiltaka.

I ei pressemelding opplyser Statsforvaltaren at arbeidet med forslag til ny koronaforskrift er sett i gang, og at kommunane og helseføretaka kan komme med innspel til utkastet fredag.

Både kommuneoverlegane og sjukehusa ønskjer tiltak så raskt som mogleg for å redusere presset på tenestene.

– Vi vil lytte til innspel, men det handlar om å finne ei forskrift som tener det store fellesskapet, seier fungerande statsforvaltar Gunnar O. Hæreid.

Forslaget skal sendast til Helsedirektoratet, med ei oppmoding om å leggje det fram for regjeringa.

Frå før er det påbod om munnbind på stader der ein ikkje kan halde ein meters avstand, og krav om registrering av gjester på serveringsstader. Dette gjeld i første omgang fram til 20. desember.

Onsdag vart dei to første tilfella av omikronvarianten i Noreg oppdaga i Øygarden kommune. Frå måndag til onsdag vart det registrert 91 smittetilfelle i kommunen, to av desse er omikronvarianten. Då var 101 personar i isolasjon.

(©NPK)