Startar opp att etter 14 år

Butikken Helse og Trivsel held på å flytta inn i lokala Øystese Gullsmed AS heldt til i. Innehavar Elisabeth Fimland Vik fortel om ein butikk med stort og variert utval. I tillegg til at butikken sel gåveartiklar og helsekostprodukt, vert ein krok sett av til brukte klede og leiker. Bruktavdelinga har fått namnet Moddy’s gjenbruk. Den skal dottera Maud Sofi ha ansvaret for.

Massasjemeny

Lokala i Tunet har eit bakrom. Der ønskjer Vik, som er medlem i Norsk Massasjeforening, å tilby klassisk massasje, aryuveda kraniemassasje og polaritetsterapi. I tillegg skal ho samarbeida med Aud Pedersen frå Bergen. Ho tilbyr fotsoneterapi og meditasjon med fokus på pust. Pedersen skal vera i Øystese eit par gonger i månaden.

Butikken opnar dørene fredag 8. mars. Det kan ta litt lenger tid før tilbodet på behandlingsrommet er oppe og går.

– Eg håpar at me vil vera i gang i løpet av nokre veker. Den første tida har eg tenkt å driva butikken sjølv. Etter kvart vil eg tilsetja fleire, slik at eg kan bruka tid på massasje og polaritetsterapi, seier Vik.

Lang pause

Vik fortel at Helse og Trivsel heldt til i Tunet frå 1996 til 2009. I 2009 prioriterte ho andre ting og selde butikken. Samstundes heldt ho på namnet, og har drive med litt terapi heimanfrå.

– Ein dag i haust gjekk eg forbi dei tomme gullsmedlokala i Tunet. Då slo det meg at tida kanskje var inne til å starta butikken att. Eg kjende at no var eg klar, fortel ho.

Dei første to månadene av 2024 har vore travle. Lokala er pussa opp og måla.