Startar nytt naturvernlag
Medlemene i Naturvernforbundet stiftar eit nytt lag i eit møte i Odda 8. mai.
Det går fram av ei pressemelding frå forbundet.
Naturvernforbundet i Kvam vert lagt ned, og eit nytt regionalt lag med namnet Naturvernforbundet Hardanger ser truleg dagens lys i eit ope møte.
Tom Skauge, leiar i Naturvernforbundet i Hordaland, meiner tida har gått frå dei små organisasjonslaga i kvar bygd, då det kan vera tøft å stå i opposisjon i små samfunn. Eit regionalt lag kan lettare lyfta fram dei viktige sakene og få fokus på miljø og klima, trur han.
Det nye laget vil dekkja Kvam, Ullensvang, Ulvik og Eidfjord. Utanom klimaet er dei store utfordringane i regionen oppdrettsindustrien, strandsoneforvaltinga og villreinen på vidda.
Det brenn eit blått lys for villreinen, som for villaksen, meiner det nye laget. Villreinen har i fleire tiår vore pressa gjennom arealinngrep, landbruksinteresser og meir turisme.
Styremedlem i det nye regionlaget, Klaus Rasmussen, skriv at forståinga veks i verda for å føra natur tilbake til det opphavlege. Naturvernforbundet vil gå i bresjen for ein større diskusjon om rovdyra si rolle i forvaltinga av naturen.
Viltbiolog gjennom 40 år, Tor Punsvik, vert med på stiftingsmøtet. Han er utdanna i naturforvalting ved Noregs miljø- og biovitskaplege universitet på Ås. Punsvik har vore viltforvaltar hjå Fylkesmannen i Agder i 36 år, med stort ansvar for villreinhandsaminga i setesdalsområda, heiter det i pressemeldinga.
