Startar konkurssaker mot to serveringsstader
Det kan verta mindre konkurranse om gjestene i Kvam.
Publisert
Det er opna konkurssaker både mot Sevik Pizzeria i hardangersenteret i Øystese og mot Strandebarn Bistro AS i Strandebarm. Dette kjem fram frå berammingslista til Hordaland tingrett.
Ifølgje proff.no er Akif Sevik innehavar av Sevik Pizzeria og dagleg leiar og styreleiar i Strandebarm Bistro. Halis Celep er oppført som eigar av bistroen. Verksemda har tidlegare vorte omtala i HF etter å ha vorte skulda for å halda ope utan serveringsløyve.
Annonse
Sevik Pizzeria heldt til i lokala der Milano Pizzeria, som også gjekk konkurs, heldt til tidlegare. Sevik tok over pizzarestauranten i april 2022.
Staten gjennom Skatteetaten står bak dei to konkurskrava. Sakene skal handsamast i tingretten tysdag 13. februar.
