Starta butikk i garasjen
– Viss folk sit og drøymer om noko, er det verdt å prøva, seier Andrea Linga.
Frå garasjen i huset på Nesodden sel Linga diverse interiørvarer. Ho opna butikken «Draumefangst» i desember 2017.– Eg har jobba i bransjen i mange år, men fekk lyst til å driva for meg sjølv for å gjera livet lettare. Med to born, og det det inneber av levering og henting, ville eg vera litt nær, seier Linga.
Ser etter unike ting
Dei fleste som bur på Nesodden, jobbar i Oslo. Pendlarvegen er lang. Viss begge foreldra skulle hatt jobb der, kunne det vorte tøft, seier Linga.– Eg fann ut at eg skulle prøva, midt i skogen på Nesodden. Det har vore veldig positivt. Det er stadig nye folk innom, seier ho.Det at Draumefangst ligg relativt nært hovudstaden – med sitt utval av butikkar – hindrar ikkje folk i å oppsøka garasjen til Linga. Dit kjem folk frå Oslo, Østfold, Fredrikstad og andre stader. Linga marknadsfører verksemda i sosiale medium og har hatt varer med seg på marknad.– Eg prøver å finna ting som ikkje er så tilgjengelege i sentrum. Folk veit at dei finn litt unike varer hos meg, seier Linga.
God respons
Linga er opphavleg frå Ålvik. Ho flytta til Austlandet for å studera, og der fann ho seg ein nesodding.Under Ålvikrock hadde ho med seg butikken «heim». Ho selde varene sine i kjellaren i Folkets hus.– Det er kjempekoseleg, og eg har fått kjemperespons. Det er god stemning med ei helg som dette, det er sosialt heile tida. Det vert fest og jobb – to fluger i éin smekk, seier Linga.Ho fortel at ålvikarane har vore særleg interesserte i dyrefigurar.
Angrar ikkje
Linga har sett ei stiging i både besøk og omsetnad sidan opninga for snart to år sidan. Ho angrar ikkje.– Eg hadde angra om eg ikkje gjorde det. Det er økonomisk utfordrande å driva for seg sjølv, særleg i ein startfase, men det er veldig moro. Viss folk sit og drøymer om noko, er det verdt å prøva, seier ho.
