Stabilt høgtrykk gir meir av same vêr

Dersom du planlegg uteaktivitetar til helga og lurer på korleis vêret blir, kan du antakeleg kikke ut vindauget no.

Den korte, presise og for mange oppmuntrande beskjeden frå meteorologen er at vi beheld vêret vi har no inn i helga.

– Kort fortalt får vi meir av det same over heile landet, seier vakthavande meteorolog Marit Bergum, til NTB.

Stabilt

Forklaringa ligg i eit stabilt høgtrykk som har lagt seg over Russland. Over store delar av landet har dette gitt stabilt godt vêr, medan lågtrykka står i kø i Atlanterhavet og sneier delar av norskekysten.

I Sør-Noreg ser det ut til å bli gråvêr med nedbør i helga. Langs kysten vil nedbøren komme som regn, medan det lengre inn i landet fell som snø. Men det er neppe julesnøen som kjem.

– Langt inn i innlandet kan det nok hende at snøen blir liggjande. I Oslo kan det godt komme snø i helga, men vi forventar lågtrykk og mildvêr inn i neste veke, seier Bergum.

Solsjansar

Vestlandet nyt godt av å liggje i le for austavinden som pregar vêrbiletet.

– Dei får sikkert gode solsjansar gjennom helga, og det ser ut som om det blir lite nedbør, seier meteorologen.

Møre og Romsdal og Trøndelag kjem òg ganske godt ut vêrmessig i helga.

– Også her er det gode solsjansar og tørt vêr. I Trondheim vil temperaturen liggje rundt null grader, seier Bergum.

I Nord-Noreg blir det tort og fint vêr fram mot helga.

– I helga blir det skyfritt fleire stader, men ikkje over alt. Temperaturmessig er vi nede på nokre få minusgrader, seier Bergum.

(©NPK)