Sprang for viktig sak og sette ny rekord

Laurdag skipa elevar ved Framnes Kristne Vidaregåande Skule til det årlege misjonsløpet. Det vart samla inn 1.138.000 kroner, som er ny rekord, opplyser prosjektleiarane Emma Kristin Gunnvordal og Håvard Lade. I fjor sprang elevane inn 1.124.000 kroner.

Arrangementet er obligatorisk for alle elevane. Løpet vart skipa til same dag som skulen inviterte til foreldredag. Difor deltok ikkje berre elevar og lærarar, men også føresette og sysken, fortel Gunnvordal.

Den største inntektskjelda

Jesus og Viggo Venn var blant dei som dukka opp i løypa. Årsaka var at det vart halde ulike konkurransar, mellom anna utkledning, før start.

– Det var veldig god stemning og mange som deltok. Det var ekstra kjekt at foreldre var med og at fleire stilte opp som publikum, seier Lade.

Deltakarane sprang ein runde på kring 500 meter, og dei heldt på i halvannan time. På førehand hadde elevane vore i kontakt med familie, vener og andre kjende for å skaffa sponsorar til løpet. Dei vart anten samde om å gje ein fast sum eller ein sum per runde som vart sprungen, forklarar Lade.

Misjonsløpet er den største inntektskjelda til prosjektet. I løpet av skuleåret arrangerer russen andre arrangement, som talentiade og russerevy, for å samla inn pengar.

Reiste til Thailand

I år har russen på Framnes misjonsaksjon gått saman med Det Norske Misjonsselskap (NMS). Pengane går til arbeidet NMS gjer i Thailand for å kjempa mot menneskehandel og gje born og unge frå fattige kår ein betre start på livet.

11. oktober reiste Gunnvordal og Lade til Thailand. Der vart dei kjende med misjonen og kyrkja, i tillegg til at dei fekk sjå dei store kontrastane mellom rike og fattige i Bangkok på nært hald. Opplevinga baud på sterke inntrykk, fortel dei.

– Me var i nokre av dei verste gatene i Bangkok og fekk sjå sexindustrien på nært hald, seier Lade.

Dei to Framnes-elevane fortel at noko av arbeidet NMS gjer, er å ta hand om kvinner som har drive med prostitusjon, og born som er i risikogruppa for å enda opp i sexindustrien.

Lade og Gunnvordal vitja mellom anna ein barnehage der borna lærer engelsk tidleg. Målet er at opplæringa skal gje dei større sjansar til å skaffa seg utdanning, forklarar Lade.

– Eit samlande prosjekt

Ifylgje heimesida til NMS er Thailand eit av landa der menneskehandel er eit stort problem. Det vert det rekna med at fleire enn 60.000 born er ein del av sexindustrien i landet. Kyrkja har ulike former for diakonalt arbeid som skal førebyggja menneskehandel, skriv misjonsselskapet.

Gunnvordal seier besøket gjorde til at ho betre forstår kor viktig prosjektet er. Dessutan kan meir kunnskap føra til større engasjement, meiner ho.

– Kvifor engasjerer de dykk?

– Me ser at arbeidet er nyttig og viktig. Når me veit meir om kva pengane går til, kan me svara når folk spør oss om noko. Det er både kjekt og gjevande å kunna gjera noko sånt for andre, seier Gunnvordal.

– Det er gjevande å bruka tid og energi på å kunna gje noko til andre. Dessutan er dette eit samlande prosjekt der alle bidreg, og eit prosjekt som får oss til å lyfta blikket, legg Lade til.