Spør fylkeskommunen om trafikktryggleik
– Ligg det føre planar om betre løysingar for mjuke trafikantar ved Tørvikbygd skule?
Det spør fylkestingsrepresentant for Industri- og Næringspartiet (INP), Bjarte Helland, administrasjonen og fylkespolitikarane om i ein e-post.
Spørsmålet vert stilt i samband med eit møte i trafikktryggingsutvalet 11. januar. Helland påpeikar at svært mange born dagleg må kryssa vegen i området ved ferjekaien. Foreldrearbeidsutvalet har teke opp fleire utfordringar her.
Helland vil òg vita om det er ein dialog mellom Kvam herad og Vestland fylkeskommune om gangveg på strekkja Pensjonisten–Torget i Ålvik. Området er regulert og har ein estimert pris. Fylkesveg 79 er ofte tungt trafikkert, spesielt når E16 er stengd. Helland meiner det er trong for å sikra mjuke trafikantar på staden, og spør korleis administrasjonen stiller seg til å setja i gang ein dialog.
Helland spør òg om det ligg føre krav til brøyteentreprenørane om kor lang tid dei har til å sikra tilstrekkeleg breidde på køyrebanen etter større snøfall. Han viser til at det er meldt om smale køyrefelt i inntil ei veke etter snøfall. Helland trekkjer fram eit døme frå Tokagjelet, der det skal ha gått fem dagar før ein hadde breiast mogleg køyrebane. Dette skal ha ført til problem for tungtrafikken.
Ei anna bekymring er at enkelte vegkryss har oppsamla snø, noko som fører til dårleg sikt, skriv Helland.
