Splitta i synet på flyktningkapasitet

Frp argumenterte for reduksjonen, som ville vore i tråd med budsjettvedtaket i desember, med mellom anna press på dei kommunale tenestene, manglande ressursar, konsekvensar for lovpålagde tenester, dårlege økonomiske utsikter og press i bustadmarknaden. Nye krav frå staten vil auka presset ytterlegare, påpeika partiet.

Ved å seia nei til 45 kan ein gje eit tydeleg signal til styresmaktene om at meir ressursar trengst, påpeika Gry M. Kyrkjeeide (Frp). Ho understreka at dei nye landsmennene må takast imot på ein skikkeleg måte for at dei skal kjenna seg trygge.

– Tek Kvam imot for mange, er risikoen stor for at ein flyktning vert ein av mange som ikkje får god nok oppfylging, men i staden vert sett på som ei belasting, sa ho.

Inntekt og tap

Berre H og INP støtta Frp. H endra syn mellom formannskaps- og heradsstyremøtet. Arne Opsahl-Engen (H) er samd i at presset på dei kommunale tenestene er for stort, etter at kvemmingane allereie har teke mot mange flyktningar. Integreringa har ikkje gått som ynskt, og mange flyktningar er traumatiserte og krevjande, påpeika han.

Han meiner saksutgreiinga tyder på at flyktningane vert sett meir på som ei inntekt enn som flyktande menneske, sidan rådmannen legg opp til å nytta tilskot til utbygging av kommunale tilbod. Kanskje trengst ein boikott av Noreg, «eit land som tener på krig, som har olje- og gassproduksjon, som produserer våpen og som kjøper våpen», sa han.

Håvard Gjerde (R) meiner det er minst like problematisk å avvisa flyktningar fordi ein tapar på dei som det motsette. Gjermund Stuve (Sp) festar lit til at innstillinga frå rådmannen er realistisk, men meiner heile Kvam bør takast i bruk til busetjing. Det er mogeleg å nytta bussar og andre transportformer til og frå tenester som ligg sentralt, påpeika han.

Svein J. Stuve (Sp) meiner mottaket er ein dugnad, og minte om at andre må ta imot flyktningane Kvam ikkje vil ta imot.

– At me må ofra litt, må me kanskje tola. Dei må vel tola mykje meir, dei som kjem, sa han.

Ville ha auke

MDG tok til orde for det motsette av Frp, nemleg ein auke i flyktningmottaket til 55, i tråd med det Integrerings- og mangfaldsdirektoratet (Imdi) har bede om. Ingen andre stilte seg bak.

Odd Valland Bovim (MDG) oppmoda om å leggja faglege vurderingar til grunn for vurderinga, og minte om at staten dekkjer det vesentlege av kostnadene. Situasjonen er ikkje verre for Kvam enn andre, meiner han.

– Talet er ikkje teke ut av lufta, men estimert av Imdi ut frå ei rimeleg fordeling av børa mellom kommunane og kor mykje dei bør klara å ta imot, sa han, og oppmoda om å ta ansvar.

Bovim minte om at det går føre seg ein krig i nærområdet. Mottaket dreiar seg om internasjonale plikter, påpeika han. Noreg burde ha stilt betre opp for Ukraina, meiner han.

– Me veit kvar krigen byrja, men ikkje kvar han kjem til å slutta, sa han.

Gunnar Kvandal (Frp) meiner det er håplaust å by over einannan i kor snill ein skal vera, og viste til at verda har eit svært høgt tal flyktningar.

– Me klarar ikkje løysa noko. Å villa hjelpa og klara å hjelpa er ikkje det same. Om me knekkjer ryggen, klarar me ikkje å hjelpa, sa han, og oppmoda om å tenkja meir langsiktig i flyktningpolitikken.

Bovim meiner debatten ikkje handlar om kor snill eller slem ein skal vera, men i kva grad ein vil vera ansvarleg. Sistnemnde vurdering sprikjer, slo han fast.

– Me har teke ansvar for det heradsstyret skal ta ansvar for. Så må staten ta sitt ansvar, sa han, og plasserte ansvaret for god oppfylging av 45 flyktningar hjå fleirtalet.

Tok imot fleire

Bjørgulv Hauger (Frp) stilte seg undrande til at rådmannen på tampen av året tok imot fleire flyktningar enn det dei folkevalde opna for i fjor, av di det var eit eigna hus ledig. Ho bør retta seg etter politiske vedtak, formana han.

Rådmann Anita Hesthamar vedgjekk at ho har busett utover rammene, men forklara at vona er at dei ekstra flyktningane kan trekkjast frå 2024-kvoten. Det vil ho oppmoda Imdi om å få høve til å gjera.

Helse- og omsorgssjef opplyste om at Imdi ikkje sluttar å spørja kommunane om busetjing når måltalet for året er nådd. Trengst fleire plassar, kjem oppmodinga.