Sparkar i gang ny universitetshaust
Spesialrådgjevar og sivilagronom Arne Bardalen ved Norsk institutt for bioøkonomi tek opp norsk mattryggleik når han opnar haustsesongen i Kvam Senioruniversitet med føredrag i Kabuso 9. september.
Bardalen har mellom anna vore direktør for Norsk institutt for jord- og skogkartlegging, har leia ei rekkje offentlege utval og hatt fleire styreverv innan det same feltet, opplyser arrangøren i ei pressemelding.
Fleire kjende namn står på programmet i haust. Tidlegare USA-korrespondent i NRK, Bjørn Hansen, tek opp eit høgaktuelt tema når han spør «Donald Trump eller Kamala Harris» 7. oktober. 4. november kjem russiskprofessor Ingunn Lunde for å snakka om Kryms historie. Tre veker seinare, 25. november, kjem Ap-veteran Martin Kolberg og snakkar om sitt politiske liv. Siste innlegg før jul står professor emeritus og kunsthistorikar Gunnar Danbolt for 16. desember. Han snakkar om jul i kunsten.
Senioruniversitetet har 109 medlemer og byr på kring fire føredrag kvar vår og haust.
