– Sparka mot politiet
Ein mann busett i Kvam er tiltala for vold mot ein offentleg tenesteperson etter ei hending nyttårsaftan.
Hendinga fann stad i Bergen sentrum. Mannen fekk ordre av politiet om å tømma ut spritflaska han drakk frå, ifylgje ei tiltaleavgjerd frå statsadvokaten. Då politibetjenten tok tak i mannen, skal sistnemnde ha dytta og gripe tak i politimannen.
Fleire politibetjentar kom til. Mannen skal ha sparka målretta mot politiet då han vart sett i politibilen.
No er han tiltala for å ha påverka ein offentleg tenesteperson med vald.
Mannen er også tiltala for å ha skjelt ut politiet. Bakgrunnen er at han i politibilen fleire gonger skal ha kome med ei rasistisk utsegn.
Forsvaren til mannen, advokat Ivar Abrahamsen, seier han fekk saka før helga og ikkje har vore i kontakt med klienten. Difor kan han ikkje kommentera saka.
Saka skal opp i Hordaland tingrett i byrjinga av april.
