– Sparing fører til større utgifter
Kvam heradsstyre har fått klar beskjed frå Utdanningsforbundet Kvam om kor det ikkje bør sparast pengar.
– Me veit at Kvam herad planlegg sparetiltak, skriv forbundet i ei løypemelding til heradet i slutten av april.
Forbundet meiner at den beste investeringa i borna er ho som førebyggjer og gjer borna robuste. Oppvekstsektoren toler innsparingar dårleg, står det.
– Sparing i oppvekstsektoren fører til større utgifter på lang sikt, skriv forbundet, som oppmodar heradsstyret om å skapa tid og rom gjennom nok ressursar.
– Tidkrevjande på alle nivå
I staden for å spara bør det brukast meir pengar, meiner forbundet. Lokallaget ber om meir ressursar i arbeidet med eit trygt og godt miljø i oppvekstsektoren.
Kapittel 9A i opplæringslova seier at alle elevar har rett til å ha eit trygt og godt skulemiljø, og barnehagelova seier det same. Endringar i lovverket har dei siste åra fått store konsekvensar for dei tilsette, meiner forbundet. Krava til skriftleg og systematisk dokumentasjon av observasjon, registrering, kartlegging, aktivitetsplan og evaluering har vorte mykje meir omfattande. For å lukkast, trengst ressursar.
Ressursmangel fører til at ein som organisasjon vil streva med å oppdaga faresignal og få systematisk oppfylging.
– Me erfarer at dette er tidkrevjande på alle nivå i organisasjonen. Ikkje minst tek det store leiarressursar, skriv forbundet.
Større leiarressurs, spesielt ved skulane, vil gjera Kvam herad betre i stand til å sikra trygge og inkluderande læringsmiljø, står det.
Takka for klede
På pedagogisk vis legg forbundet inn litt skryt til dei lokale politikarane. Fleire tiltak har gjeve god nytte. Auka bemanning i barnehagane, ordninga med vikarkoordinatorar og tilsetjing av miljørettleiarar i skulen er gode døme.
– Det er til uvurderleg hjelp! skriv forbundet.
Ordninga med vikarkoordinatorar har gjort at barnehagane har unngått kriseløysingar, som at foreldre vert oppmoda om å henta borna tidleg, ifylgje brevet.
Lokallaget takkar òg for meir pengar til arbeidsklede til tilsette i barnehagar, og skriv at auken i klesbudsjettet var særs kjærkomen. Dei tilsette er nøgde, ifylgje skrivet.
