Spår aukande arbeidsløyse
Det var få arbeidslause i Kvam og Ullensvang i januar. Nav Vestland trur talet kan auka dei neste månadene.
Tal frå Nav Vestland syner at 47 kvemmingar var heilt arbeidslause i januar. Dei utgjer 1,1 prosent av arbeidsstyrken. Talet gjev ein nedgang på 22 prosent samanlikna med same tid i fjor.
I Ullensvang var 85 heilt ledige i januar. Det er 1,5 prosent av arbeidsstyrken. Samanlikna med januar i fjor er det ein auke på 13 prosent.
Ifølgje ei pressemelding frå Nav var 1,9 prosent av arbeidsstyrken, eller 6.630 personar, i Vestland heilt ledig i januar. Nav spår at talet vil auka og enda på om lag 7.500 personar i snitt i 2024.
– Det vil framleis vera mange ledige jobbar i ei rekkje bransjar. Utfordringa er at dei som er ledige, ofte har ein annan kompetanse enn arbeidsgivarane søkjer etter, seier direktør Anne Kverneland Bogsnes i Nav Vestland i pressemeldinga.
