Spår 30.000 gjester i sherpatrappa
Herand Idrettslag fekk avslag på søknaden om statleg stønad til «Hardangertrappa» til Samlen.
Laget søkte om 648.000 kroner i tilskot frå Miljødirektoratet si ordning for nasjonale turstiar.
I søknaden er det opplyst at det med god tilrettelegging og marknadsføring er venta 30.000 besøkjande i året, mot dagens om lag 6.000. Idrettslaget reknar med at om lag 60 prosent av gjestene vil vera utlendingar.
Direktoratet viser i avslaget til at dagens besøkstal tilseier at søknaden ikkje gjeld ein svært mykje nytta tursti. Dessutan etterlyser direktoratet informasjon om korleis dei 30.000 venta gjestene skal handterast.
– I arbeid med tilrettelegging av sti er det viktig å arbeida med heilskaplege og langsiktige planar for korleis ein skal forvalta eit område med mykje besøk. Eit slik arbeid vil òg vera viktig for oss i vurdering av søknader om støtte. Ein kan bruka besøksforvalting som eit verktøy i strategisk, langsiktig og heilskapleg forvalting av mykje besøkte naturområde. God besøksforvaltning sikrar gode val før tilretteleggingstiltak, skriv direktoratet.
Den samla kostnadsramma for prosjektet er 3,6 millionar kroner. Den fyrste delen av arbeidet, som vart utført i haust, kosta 1,1 millionar kroner. Idrettslaget manglar ifylgje søknaden berre summen staten vart søkt om for å få også den siste delen fullfinansiert.
