Spanderte russegenser på alle
Kvam vidaregåande skule har opna lommeboka og spandert russegenser på årets russ. Elev Kajetan Sawicki står bak designet.
– Det er viktig for oss at russen er éi gruppe, sa assisterande rektor Samson Håland då genserane vart delte ut 25. april, like før russefeiringa braka laus.
Ifylgje Håland er Vestland fylkeskommune veldig oppteken av russetida, og at ho skal vera god og trygg for alle. Med genseren ynskjer skulen å symbolisera samhald, inkludering og identitet.
– Og no snakkar me ikkje berre om det, men gjer noko for det, sa den assisterande rektoren.
Gamalt frå «gampen»
Elevar frå alle skuletrinna har vore med på prosessen for å koma fram til «rett» genser. Ifylgje han som enda med vinnardesignet, Kajetan Sawicki, vart det laga fleire forslag. Resultatet vart ein mørk, blå genser, med «kvammagampen» på – inspirert av russeavisa med same namnet. Bakpå genseren står fire velvalde ord og etternamnet til eleven.
– Eg tok utgangspunkt i ei utgåve av Kvammagampen frå 1980-talet ein gong. Så brukte eg litt av slagorda frå avisa, og fann ut når russen vart grunnlagd. Også hesten er frå avisa, fortel Sawicki.
Fyndorda på ryggen er: avslørande, tilslørande, opprørande og forførande.
– Er du nøgd?
– Ja, eg synest det vart veldig bra. Det er moro å sjå at alle går med han, og kjekt at noko ein lagar, vert sett pris på, seier den unge designaren.
Russepresident Lars Stevnebø Kaale tykkjer initiativet om ein felles russegenser er veldig positivt. Han har tru på at det vil vera med på å skapa betre samhald og ei kjensle av fellesskap på skulen. Og det er bra, seier presidenten.
– Genserane er veldig gode, og har vorte flittig brukt fyrste helga. Eg trur alle på trinnet er nøgde med tiltaket. Sjølv måtte eg hiva han i vask i går, skriv Kaale i ein sms.
Vil halda fram
Miljøkoordinator ved skulen, Daniel Næss, seier ideen kom frå leiinga, som ville sjå på tiltak som kan skapa fellesskap og hindra utanforskap. Ein liknande idé er testa i Sogndal tidlegare, med hell, fortel Håland. Neste skuleår håpar han at russegenseren kan verta delt ut allereie før jul. Utgiftene, som er på om lag 600 kroner per genser, dekkjer skulen.
– Me håpar det vert ei god investering, seier Håland.
Inntrykket til Næss er at russekullet er flink til å ta vare på kvarandre, og at alle inviterer alle når det skjer noko. Det håpar han elevane tek med i russefeiringa.
