Sommarskisenteret opnar 8. mai
Fjoråret vart eit rekordår for sommarskisenteret på Folgefonna. No jobbar Visitfonna AS fram mot opning av ein ny sesong.
I eit normalt år er skiheisen på Folgefonna open i om lag 110 dagar. Talet på dagar i drift i fjor var 160. No er dei tilsette i full sving med å gjera klart skisenteret til ein ny sesong. Sommarskisenteret planlegg å opna laurdag 8. mai.
Om det vert eit nytt rekordår, er ikkje sikkert.
— Det er mindre snø i år, men samstundes har me fasilitetar som legg til rette for å oppleva breen utan å vera i skiheisen, fortel Michael Iversen.
Iversen er dagleg leiar i Visitfonna AS. Han siktar til velkomstsenteret som stod klart i fjor og til turar til fots på breen. I velkomstsenteret kan ein nyta god mat og drikke inne eller ute, med utsikt i verdsklasse. No er tribunen på taket klar òg.
— Me har òg inngått eit samarbeid med Bygdalarm i år, og det er spennande, seier Iversen.
Leiaren vil ikkje fortelja så mykje om det endå, men oppmodar folk om å fylgja godt med.
Skisenteret kjenner seg godt førebudde på ein korona-sesong til, og opnar for same mengde gjester i skibakkane som i 2020.
— Me fekk god øving i det i fjor. Me var det anlegget i landet som hadde lengst ope, så me kjenner godt til det å driva med restriksjonar. Det vert også i år ei avgrensing på 500 gjester i bakken kvar dag, seier Iversen.
Ein god del grupper har tinga plass i bakken allereie, ikkje berre norske alpinklubbar og lag, men frå heile verda. Iversen håpar restriksjonane vert lettare og at laga slepp inn i landet.
