Sola skal skine i Finnmark, medan resten av landet får grått vêr
Store delar av Noreg får grått vêr på torsdag, med unntak av Finnmark: – Torsdag blir den gråaste dagen framover, seier meteorologen.
– Det ligg eit lågtrykk og tilhøyrande nedbørsfrontar i Norskehavet. Det vil berøre det meste av landet, seier vakthavande meteorolog Marit Berger i Meteorologisk institutt.
Heile Sør-Noreg og heilt nord til Nordland vil rammast av dette. Men heldigvis vil det stusslege vêret ikkje halde fram heile helga.
Artikkelen held fram under annonsen.
– Torsdag blir den gråaste dagen. Deretter blir det litt vekslande vêr, seier Berger.
Det er lågtrykksaktivitet i Norskehavet, som er årsaka til nedbøren torsdag.
– Finnmark derimot får fint vêr, ser det ut som, legg ho til!
På Nordkapp ligg temperaturane på 20 grader på torsdag.
– For tidleg å seie at sommaren er over
Sjølv om vi har nokre gråvêrsdagar i vente store delar av landet, så er ikkje sommaren over.
– Det kan vere gode dagar heilt utover i september, seier Berger.
Kjem vi oss gjennom torsdag og fredag, så blir helga nokså vekslande – sola vil kikke fram mellom slaga.
På Austlandet vil temperaturane liggje på rundt 20 grader. Lenger nord i landet vil dei liggje på mellom 15 og 20 grader.
Artikkelen held fram under annonsen.
Risiko for tore i Oslo
På Austlandet er det risiko for tore allereie frå onsdag av.
– Nedbør skal passere gjennom Austlandet onsdag, torsdag og fredag. Onsdag kveld bør ein vere obs på tore, seier Berger.
På Vestlandet blir det ikkje torevêr, men det kan blåse ein del.
– Der blir det ein gode del vind i periodar, seier Berger.
Skogbrannfare i Nord-Noreg
Meteorologen minner også om at det er skogbrannfare i Nord-Noreg for tida, men dersom det kjem nok nedbør, vil faren gå ned. Det er godt at regnet kan gjere nytte for seg.
Det er skogbrannvarsel i Vesterålen, Troms og Finnmark.
– Det kan hende skogbrannfaren vil halde fram stadvis, då det ikkje er sikkert det kjem så mykje nedbør alle stader, som til dømes i Finnmark. Men i Nordland kjem det ganske sikkert nok nedbør til at det blir betre forhold, legg Berger til.
(©NPK)
