– Søknader må handsamast under eitt
Det manglar ei formell godkjenning av ein omsøkt felles bestandsplan for Hardanger og Voss bestandplanområde for hjort.
Det skriv leiar i bestandplanområdet, Ørjan Himle, i eit brev til rådmennene i Kvam herad og Voss herad.
Fleire hjortevald i Kvam og Voss har søkt om og fått godkjenning for ein felles bestandsplan og bestandsplanområde sidan 2016. Søknadene har likevel ikkje vorte handsama under eitt.
Ein konsekvens av at herada ikkje handterer søknaden slik dei skal, er at valda ikkje oppnår å kunna nyttiggjera seg av ordninga om overføring av fellingsløyve mellom valda. Det kunne valda ha gjort dersom herada hadde handtert søknaden korrekt, meiner Himle.
Saka er teken opp med sakshandsamarane i herada ved fleire høve, med ynske om at det vert ordna opp i. Det har til no ikkje medført endring, ifylgje Himle.
Han ber om at det formelle må koma på plass, slik at medlemsvalda i framtida kan vera sikre på at dei kan nytta dei fleksible ordningane for hjorteforvaltinga. Det vil vera eit godt bidrag til å kunna nå måla i forvaltinga, skriv han.
Bestandplanområdet ber om at det formelle vert ordna, slik at det gjeld til oppstart av hjortejakta 2022.
