Snusar på å gjera hytte til hus for å få stønad
– Kan ein endra klassifiseringa av ein fritidsbustad slik at ein får straumstønad?
Det spørsmålet har ein hytteeigar på Kvamskogen stilt Kvam herad i eit straumbrev. Han syner til at dagens ordning for straumstønad gjeld private hushald, men ikkje fritidsbustader. Familien nyttar hytta mykje, og ho har like gode kvalitetar som heimen, opplyser eigaren.
Spørsmålet er prinsipielt. Det må fyrst avklarast gjennom kommunedelplanen for Kvamskogen og deretter gjennom reguleringsplanar, svarar rådmannen.
Hovudregelen er å fylgja reguleringsplanen, og den aktuelle eigedomen er regulert til hytteføremål. Bruksendring vil vera i strid med reguleringsplanen, men plan- og bygningslova opnar for å søkja om dispensasjon.
– Dersom du argumenterer for søknaden med ynske om å få straumstønad, vil det vera ei privatøkonomisk interesse som normalt får lita vekt i søknadsvurderinga, skriv rådmannen.
Om alle relevante krav i plan- og bygningslova er stetta, vil det normalt krevja ein del ombygging av hytta for å tilfredsstilla dei materielle krava i lov og forskrift. Rådmannen påpeikar at gebyret for handsaming av dispensasjonssøknader er 18.450 kroner, og for bruksendring 17.425 kroner.
