Snuoperasjon tek tid
Regjeringa lova å reversera domstolsreforma, men snart to år etter høyringa er det enno ikkje teke ei avgjerd.
I 2021 vart talet på tingrettar redusert frå 60 til 23. Etter valet i 2021 lova Ap- og Sp-regjeringa å gjera om reforma, men fyrst var endringa på høyring.
Ifylgje statssekretær Hans-Petter Aasen i Justisdepartementet kom det inn over 450 svar då reversering av reforma var på høyring våren 2022. Sidan er det kome nokre nye innspel.
– For regjeringa er det viktig å betra rettstryggleiken til den enkelte ved mellom anna å styrkje domstolane. Difor har me brukt tid for å ta omsyn til dette. Det er ein kompleks og samansett prosess, som me jobbar kontinuerleg med. Me skjønar sjølvsagt at det er ynskeleg med ei snarleg avklaring, seier han.
Han forsikrar om at lovnaden i Hurdalsplattforma, basisen for samarbeidet mellom Ap og Sp, framleis ligg til grunn.
Ordførar Roald Aga Haug (Ap) i Ullensvang meiner at det hastar å oppretta eigen tingrett i Hardanger att, skriv Klassekampen.
– Me trudde dette skulle vera greitt, seier han til avisa.
Haug hevdar at det ikkje kan dokumenterast at mindre tingrettar fungerer dårlegare enn større, og at reforma har ført til meir byråkrati og at sakene ikkje kjem for retten i regionen dei høyrer heime i.
