Snudde opp ned på Hardanger

Når bladfykar vêrar agurkar i juli, er dei ikkje til å stogga. HF var såleis ikkje sein med å ta kontakt med dei to karane som stod bak dei oppsiktsvekkjande utskeiingane bak køyretøya på MF «Samlafjord» 30. juni.

Dei to mennene viste seg å vera Michael Bennett og Baldave Lota, å koma frå London, å vera på ei vekes noregsferie og å vera i noko betre form enn dei aller fleste av oss. Stå på hovudet midt på blanke dagen og blanke bildekket gjorde dei enkelt og greitt berre for moro.

Ferjeturen var noko av det siste som skulle skje før dei sette kursen mot Bergen og etter kvart England, etter ei veke i Noreg.

Mildt sagt aktiv ferie

På den tida rakk duoen mykje meir enn å stå og gå på hendene: Britane tok Flåmsbana til Myrdal og sykla sidan 24 kilometer tilbake til Flåm, i tillegg til at dei gjekk fleire fjellturar i aurlandsområdet. Dei sette deretter kursen mot Hardanger og gjekk tur både på Buerbreen og Trolltunga i Ullensvang.

Også på sistnemnde fjellformasjon nytta karane sjansen til å stå på hendene. Diverre mista den eine av dei ein telefon med ymse dokumentasjon av både reisa og fysiske eskapadar. Litt har dei seg sjølv å takka; den smarte dingsen spratt or lomma då sprekingane sprang den siste halve mila på veg tilbake til Skjeggedal.

Bennett og Lota arbeider som høvesvis økonomirådgjevar og dataanalytikar, men lekamane deira ber ikkje nemneleg preg av det. Bennett fortel at båe har ein livsstil som er gjennomsyra av trening, noko ferien i Noreg altså bar preg av.

Endåtil påfunnet med å stå på hendene har ei naturleg forklaring: Engelskmennene opptekne av «calisthenics», ei treningsform som går ut på å nytta utelukkande kroppsvekta til å verta sprek og oppnå god lekamleg kontroll. Dei fylgjer nordmannen Sondre Berg, som har vorte ein guru på feltet, i sosiale medium. Lota har spesialisert seg på denne treninga, medan Bennett i tillegg putlar med vektlyfting, bryting og brasiliansk jiu jitsu.

– Ladde og utslitne

Bennett fortel at dei var på jakt etter ein ferie med mykje aktivitet og drusteleg natur. Med den korte reisa frå London var Noreg eit opplagt val, fortel han.

– Korleis, alt i alt, var ferien i Noreg?

– Eg vil seia det var ein av mine beste feriar nokosinne. Naturen i Noreg er ikkje som noko eg har sett før, og han legg til rette for ei rekkje artige aktivitetar utandørs. Me elska å vera omringa av fjordar, fossar, innsjøar og elvar. Eg såg meir av dette enn eg har gjort heile livet i Storbritannia. Folk var venlege, og Noreg kjendest meir fredeleg og avslappande enn London. Me kom tilbake hit og kjende oss mentalt oppladde, men fysisk utslitne! fortel Bennett.