Snøskuter-saka: – Uønskt vedtak utan fagleg grunnlag
Friluftslivsorganisasjonane er skuffa over Stortingets endring av snøskuterregelverket i Noreg, og meiner det burde vore ei konsekvensutgreiing først.
Tysdag vedtok eit fleirtal i Stortinget å fjerne avstandskravet i motorferdselslova, som seier at ei hytte må liggje meir enn 2,5 kilometer frå brøyta bilveg for å kunne få løyve til å køyre eigen snøskuter.
– Denne regelendringa er eit tap for friluftsfolk over heile landet, og for alle som søkjer fjellet for å oppleve stille og urørt natur. Motorisert ferdsel i naturen får stadig meir plass, og det er ei trist utvikling som endrar dei tradisjonelle friluftslivsverdiane våre, seier generalsekretær i Norsk Friluftsliv, Lasse Heimdal, i ei pressemelding.
Artikkelen held fram under annonsen.
Klima- og miljøminister Sveinung Rotevatn hadde før vedtaket i Stortinget sendt saka ut på høyring, for å få tilbakemeldingar på korleis regelverket skal utformast.
– Vi har trass i Stortingets hastevedtak forventningar til at Rotevatn tar ansvar, og i det minste får på plass ei følgjeevaluering, og sørgjer for auka midlar til oppsyn og kontroll, seier Lasse Heimdal.
Den Norske Turistforening kallar regelendringa eit lite klok vedtak.
– Dette er eit veldig skuffande og lite klokt vedtak, som luktar hastverk og hestehandel. Vi forstår at denne lovendringa kan ha noko for seg i delar av landet, men det store fleirtalet av Noregs befolkning ønskjer ikkje dette. Hadde dei som står bak dette fleirtalet vore nokolunde ansvarlege hadde ein undersøkt dette for nokre område – og ikkje vedtatt frislepp over heile landet, seier generalsekretær i DNT Dag Terje Klarp Solvang.
(©NPK)
