Snøskredvarslar ber foreldre vere merksame på skredfare utanfor skianlegga i påska

Dersom ein køyrer utanfor dei preparerte løypene i alpinbakken, lurer snøskredfaren i terrenget. Ein snøskredvarslar ber foreldre vere på vakt i påska.

– Det er viktig å vere klar over at å køyre utanfor preparerte løyper nær skianlegg må vurderast på lik linje som når ein er på topptur, seier snøskredvarslar Emma Julseth Barfod i Noregs vassdrags- og energidirektorat (NVE).

Skredterreng er terreng der hellinga er 30 grader og brattare. I påska skal mange familiar på fjellet for å feire påska der. Då kan eventyrlysta melde seg for både store og små.

– Vi tilrår at foreldre undersøkjer kvar det er skredterreng nær skianlegg, og ikkje la barn og unge køyre der åleine, fortel Barfod.

Ho understrekar at fleire barn og unge har vorte tekne av snøskred nær skianlegg dei siste åra.

– Synest du det er vanskeleg å forstå snøskredvarselet og gjeldande skredproblem, bør du unngå å ferdast i skredterreng, seier Barfod.

(©NPK)