Snøskredfare fleire stader i landet

Det er stor snøskredfare og farevarsel på raudt nivå i Nord-Troms og Lyngen. Frå tysdag er det venta betydeleg fare i mellom anna Hardanger, Sogn og på Voss.

I Nord-Troms og Lyngen er snøskredvarselet no på nivå 4, det nest høgaste nivået på skalaen.

– Store skred kan losne av seg sjølve på grunn av kraftig vind og snøbyer. Unngå skredterreng, heiter det i snøskredvarselet på varsom.no.

Det er også betydeleg snøskredfare i Vest-Finnmark og i store delar av Troms, Nordland og Møre og Romsdal.

Frå tysdag er det også venta betydeleg snøskredfare i Hardanger, Indre Fjordane, Jotunheimen, Indre Sogn, Voss, Heiane på Stord og i Vest-Telemark. Det er sendt ut oransje farevarsel for desse områda.

Samtidig er det venta snø i fleire delar av landet. Meteorologisk institutt har sendt ut to gule farevarsel for snø på Sør- og Austlandet frå tysdag.

I Agder kan det komme ti til 20 centimeter snø, medan det på Austlandet kan komme frå 5 til 10 centimeter.

– Det blir lokalt vanskelege køyreforhold, så køyr etter forholda, åtvarar meteorologane i eit innlegg på X.

(©NPK)