Snø stengde naudutgangar

Glasfasaden førte til at snøen på taket rasa ned framom atriet. Etter kvart som snøhaugen vaks, vart dei to dørene frå atriet og ut mot hagen blokkerte. Stein Rykkje, leiar for forvalting, vedlikehald og drift i Kvam herad, seier at heradet gjorde hovudentreprenør Fuglafjell AS merksam på problemet allereie under bygginga i fjor vinter.

Dørene er naudutgangar. For å sikra tryggleiken, bad heradet Fuglafjell om å montera snøfangarar. Så enkelt er det ikkje på eit glastak, ifylgje entreprenøren, som føreslo ei anna løysing.

Framleis er ikkje mangelen retta opp i, men no er partane samde om ei løysing, opplyser entreprenøren.

Føreslo å stengja av

Fuglafjell kontakta fyrst leverandøren av glastaket, Schüco Norge, for å få innspel. Leverandøren rådde frå å montera snøfangarar, då oppsamling av snø på glastaket kan medføra lekkasje, skreiv byggjeleiar i Fuglafjell, Bård Sandven, i ein e-post til Kvam herad i januar.

Entreprenøren føreslo i staden å setja opp ein levegg ved dørene for å hindra snø i å blokkera utgangen, og å setja opp eit sperreband eller ein kjetting rundt området der snøen treffer bakken om vinteren. Om det i tillegg hadde vorte lagt varmekablar på delar av svalgangstaket, i takrennene og i ei renne framom atriumveggen, ville problema forsvinna, meinte verksemda.

Rykkje svara at bruk av varmekablar ikkje eignar seg, og påpeika at det heller ikkje er bra for miljørekneskapen. Å godta nedfall frå tak ved å setja opp sperreband er heller ikkje ei god og varig løysing, uttrykte han.

– Det vil også koma snø ned på tilstøytande tak og svalgangstak, som er svært uheldig, skreiv Rykkje til Sandven.

– Meiner de det?

Eitt av krava Kvam herad stilte til entreprenøren før bygging, var at bygget skulle stetta krava i byggteknisk forskrift (TEK17). Rykkje meiner at forskrifta inneber at tak skal sikrast med tanke på nedfall, og skreiv til Sandven at heradet forventa akkurat det.

– Meiner de verkeleg at de har levert ein konstruksjon som ikkje toler det som må til for å stetta krava i teknisk forskrift? spurde han.

Forskrifta seier at byggverk skal sikrast slik at is og snø ikkje kan falla ned på stader der personar og husdyr kan opphalda seg. Fuglafjell meinte at krava i forskrifta vart stetta ved å sperra av det rasutsette området, då det ville hindra personar og husdyr i å halda seg inntil bygget.

– I vinterhalvåret reknar me med at det uansett er lite aktuelt å bevega seg i det aktuelle området, svara Sandven.

Lang mangelliste

Då HF kontakta Rykkje 7. juni, opplyste han at det etter overtakinga jamleg har vorte purra på ei rekkje manglar i bygget. Også nye manglar som heradet ikkje oppdaga før overtakinga, har dukka opp.

– Ved overtaking var det mykje som ikkje var ferdigstilt av arbeid, og mangellister som det har vore vanskeleg å få kvitterte ut, skriv Rykkje i ein e-post.

Han opplyser at heradet no går gjennom attståande manglar.

I større byggjeprosjekt er det ikkje uvanleg med mangellister ved overtaking, skriv Arne Lunestad, dagleg leiar i Fuglafjell, til HF.

Listene vert skrivne for å ha oversikt og sikra kvalitet, opplyser han. Stundom er det knytt ulike problemstillingar til manglar, som må avklarast før dei kan kvitterast ut. Målet er alltid å ordna manglar så snart som mogeleg, ifylgje den daglege leiaren.

Gjennom god dialog med Kvam herad er Fuglafjell trygg på at dei resterande punkta kan løysast snarleg, opplyser han. I ein e-post frå Lunestad 7. juni kjem det fram at entreprenøren og heradet altså har vorte samde om ei løysing.

– Samde om løysing

Heradet, entreprenøren og leverandøren av glastaket har drøfta saka. Nyleg fekk Fuglafjell tilbakemelding om at heradet ynskjer snøfangarar, som vil verta monterte innan rimeleg tid, skriv Lunestad.

– Kva er rimeleg tid?

– Tida som går med til bestilling og planlegging, og eventuell tilpassing for å minska ulempene for drifta av omsorgsbustadene. I alle høve i god tid før neste snøfall, svarar Lunestad.

– Leverandøren har tidlegare rådd frå å montera snøfangarar på grunn av fare for lekkasje. Har de funne ei løysing for å unngå dette?

– Me arbeider saman med Kvam herad og underleverandør for å finna den beste løysinga, skriv Lunestad.