Snart klar i Sjøhuset
Folk var ikkje vanskelege å få ut av solstolen då Thon Hotel Sandven opna døra på gløtt til det nyrestaurerte Sjøhuset.
Då HF kom til staden – tidsnok til berre å få med seg applausen før døra til Sjøhuset vart opna for prøving –, gjekk køen allereie langt utanfor bygget.
Sola skein om kapp med blømande rododendronar, og uteserveringa var nær fullsett. Ifylgje hotelldirektøren var ingen spesielt inviterte til prøveopninga, men både hotellgjester og lokale lét seg freista av nytrekt kaffi og marsipankake i nye lokale.
Så godt som klart
I løpet av vinteren og våren er det meste av det historiske bygget bytt ut både innvendig og utvendig. I dag var tida inne for å visa resultatet og prøva å servera frå lokalet.
– Me ynskte å ha ei prøveopning for å testa litt korleis det er, seier Marie Skutlaberg Kjøsnes, hotelldirektør ved Thon Hotel Sandven.
Ved inngangsdøra til det nyoppussa bygget ynskte ho gjester velkomne. Det fine vêret, og ikkje minst at finvêret kom på ein laurdag, var nok med på å sparka i gang prøveopninga, fortel ho. Planen er å opna for fullt komande onsdag.
Det fyrste kvelden vert det truleg ikkje ope til langt på natt, spår direktøren, men litt pub vert det. Om ikkje alt er heilt klart, er det ikkje langt ifrå. Kjøsnes nemner ein tv-skjerm, noko musikk og ei kaffimaskin som må koplast til og koma på plass før alt er klart.
– Godt resultat
Fleire forbipasserande lét vel og gratulerte direktøren medan HF slo av ein prat med henne. Det kjennest bra endeleg å vera i mål, og resultatet har vorte bra både inne og ute, synest ho.
– Det er flott! Det er lyst og fine fargar, og så vert det mykje enklare mellom anna med uteservering, seier Kjøsnes.
«Me får håpa folk har vit til å ta det i bruk», nemnde ein kar i kakekøen. Håpet er der. Han var nemleg frå nabobygda.
