Snart i gang etter driftspause

I februar opnar Uni Sushi & Izakaya dørene i Norheimsund etter tre månadars driftspause. Både kjøkensjefen og menyen er ny.

6. november i fjor melde restauranten på Facebook at dørene ville vera stengde i eit par veker. Men veker vart til månadar.

– Me skulle eigentleg ha med oss julebordsesongen før pausen, men så fekk eg inn ei sjukmelding og hadde ikkje nok mannskap til å gjennomføra på ein god måte, forklarer eigar og dagleg leiar i Barmen AS, Espen Nordset Raknes, som driv restauranten.

I januar er det lågsesong, og det var planlagt ferieavvikling heile månaden, fortel drivaren. Den planlagde pausen skulle brukast til å gå gjennom menyen, sjå på tala og evaluera kva kvemmingane vil ha.

6. februar vert det ein såkalla «soft opening» av sushirestauranten i Norheimsund. Då skal Raknes og den nye kjøkensjefen Abdullah Ramadan, eller Abbe, som han vert kalla, invitera gode kundar og vener til ein smaksprøvekveld.

– Me har sett saman ein ny meny og har nye tilsette. Då får me testa om alt fungerer i praksis på kjøkenet, med gjestar som er tolmodige. Skulle alt gå på tverke, har me mange flasker med lokale bobler på lager, seier Raknes.

– Ei økonomisk smørje

Den nye kjøkensjefen har jobba som sushikokk i 16 år, og har mellom anna arbeidd i Oslo, London og København.

– Kvaliteten på maten skal vera den same, og smakane skal vera like. Det vert kanskje nokre små forskjellar, seier Raknes.

Raknes driv catering og servering i Hallvardsnaustet, i tillegg til sushirestauranten. Alt er samla i Barmen AS. Raknes fortel at drifta av restauranten i Norheimsund skal byggja vidare på grunnlaget som allereie er lagt. Han seier at det har vore vanskeleg å ha full kontroll over det økonomiske for sushirestauranten. Difor har Raknes planar om å skilja restauranten ut ei eit eige driftsselskap.

– Alt er ei smørje reint økonomisk. Med tanke på at administrasjonen består nesten berre av meg, vert det litt mykje å halda styr på. Men sushirestauranten har vorte godt motteken. Besøkstala har vore gode og omsetninga god, seier Raknes.

– Skal snakka norsk

Restauranteigaren har eit mål om å verta aktiv i sosiale medium. Der vil han visa korleis maten vert laga og kvifor han er glad i den japanske matkulturen.

– Me vil gje kundar innblikk i lidenskapen vår. Det meste er handarbeid, og skal lagast på huset. Om me deler informasjon om det me gjer, kan folk sjølve trekkja konklusjonane, seier Raknes.

I motsetning til i fjor skal servitørane kunna norsk. Raknes seier at gjestene har hatt eit ynske om å kunna få rettane forklarte på norsk.

Når han tenkjer tilbake på opningsdagane, seier han at det var dei kjekkaste dagane han har hatt i heile sitt liv. Raknes har drøymt om å driva sushirestaurant i ti år, og vonar dette vert den fyrste Uni-restauranten av mange.

– Det var fantastisk å stå der side om side med dei gutane og byggja det som har vore ein draum for meg. No har me analysert det som har vore, og teke læring av det. Eg og Abbe jobbar med å utvikla konseptet til nye høgder. Det er ufatteleg moro, seier Raknes.

Målet hans er at andre skal få auga opp for den fantastiske japanske maten, seier han.

Kuttar lunsjen

Denne vinteren kjem opningstidene til å verta kortare, så det blir ikkje mogleg å kjøpa sushi til lunsj, fortel Raknes. Han seier at det ikkje lønte seg å ha så lange opningstider.

– Det gjekk ikkje heilt rundt med lunsjen. Det går i turistsesongen, men utanom er det vanskeleg.

Ifylgje Raknes vert det mogleg å bestilla mat for å ta med seg heim. Han seier at han har vurdert å starta med utkøyring.

– Me må tenkja oss godt om før me vert vår eigen «Foodora». Det kan vera utfordrande sidan kommunen er så lang, men me ser heile tida på moglegheiter for å utvikla oss og ha eit best mogleg produkt, seier restauranteigaren.

Sjå «Abbe» i aksjon på kjøkenet: