Snart betre skilting ved fossen

Konsulentselskapet har utarbeidd eit forslag om ny skilting på oppdrag frå turistvegseksjonen i SV, opplyser Ellen Katrine Olsen i samferdsleavdelinga i verksemda. Køyreretning og parkeringsplassar for personbil, handikapparkering og parkering for buss er vist med oppmerking.

Det er ei blanding av fleire trafikantgrupper på staden. Hovudproblemet er feilparkeringar. Bubilar og andre køyretøy trassar oppmerkinga og parkerer på plassar som er reserverte for bussar. Det er òg problem knytt til at særleg bubilsjåførar nyttar plassane til overnatting, og dermed kan vera til hinder for busstrafikken og ordinær personbiltrafikk.

— Enkelte grupper bør dermed ha tidsavgrensing på parkeringa, skriv Olsen.

— Me føreslår tydeleg skilting, særleg med gjentaking av reservasjon for buss. Tiltaket skal sørgja for at trafikantane får med seg informasjonen om tidsavgrensing, og at det er klart kvar det er tillate å parkera for personbilar og bubilar, skriv Olsen.

Framlegget har vore på høyring, også i Kvam herad, utan å hausta merknader.

Ventar på produksjon

Therese Ruud er strekningsansvarleg i Nasjonale turistvegar for Hardanger, Gaularfjellet, Aurlandsfjellet og Hardangervidda i Statens vegvesen. Ho seier dei nye skilta kjem opp så fort som mogleg. Dei er tinga og skal produserast.

— Me håpar å få dei på plass før høgsesongen startar, seier Ruud.

Det vert skiltregulert opphaldstid på parkeringsplassen. Det vegvesenet ynskjer, er å unngå at parkeringsplassen vert nytta som campingområde utover dagen.

— Vert lett kaos

— Kor stor innverknad på framferda i trafikken har slike skilt?

— Det er eit spørsmål, det, men me håpar det kan vera ei oppmoding om korleis folk vil bruka plassen og at dei vil forstå at meininga er at flest mogleg skal kunna bruka parkeringsplassen slik han er tenkt. Det finst fleire campingplassar i bygda som gjerne tek imot folk som skal bu der mange netter. Me ynskjer at desse skal verta tekne i bruk, heller enn at bubilane står på parkeringsplassar. Me ser at mange ynskjer å reisa langs vegen. Det kan lett oppstå kaos ved Steinsdalsfossen om morgonen, når turbussane kjem, seier Ruud.

— Bubilane må gjerne stå der ei natt. Men når natta er over, må me pent be dei om å reisa vidare. Det kjem både bussar med cruisebåtpassasjerar frå Bergen, bubilar og personbilar. Me ynskjer at plassen skal verta mykje bruka. Staten har investert mykje pengar der. Då er det viktig at me alle forvaltar plassen slik at det vert plass til alle. Det me ynskjer, er å oppfordra til fornuftig bruk, seier Ruud.

Flest utlendingar feilparkerer

Børge Nordlinder Nitter driv turistinformasjonen ved Steinsdalsfossen for Kvam herad. Han opplyser at mange bubilar — for det meste utanlandske — feilparkerte ved fossen i fjor. Dei vart ståande til langt ut på neste dag og sperra for andre gjester. Nokre brukte busslommene til å parkera i. Mest problematisk var det mellom 20. juni og 20. august. I skuldersesongane var det ikkje noko problem.

Nitter trur ikkje det vil verta dei same problema i år, då nordmenn er flinkare til å følgja reglane, og både italienarar, spanjolar og tyskarar har innreiseforbod. Berre danskar har lov å koma til Noreg. Det er flest nordmenn som kjem, både frå Rogaland, Austlandet og Bergen. Nitter har ikkje registrert bussar med cruisegjester, og dei kjem nok ikkje på ei god stund enno.

— Det er opp til styresmaktene, seier Nitter.

Det er stille i vekene, og ofte bra besøkt i helgane, litt avhengig av vêret. Nokre er på rekognosering for sommaren, fortel Nitter.