Smotthol for utbygging på skogen?

Maren Lerøen får likevel føra opp eit tilbygg nær fylkesveg 7 på Kvamskogen. Den fylkeskommunale klagenemnda har gjort om avslaget som Statens vegvesen gav henne før jul.

Grunngjevinga tilseier at nemnda legg meir vekt på kommunal sjølvråderett i vurderingar av dispensasjonar frå kravet om gang- og sykkelveg på strekkja frå Ungdomsheimen til Kvamskogen landhandleri.

– Klagenemnda viser til at vegvesenet sine vurderingar knytte til kommuneplanen allereie er vurderte av kommunen og at dei har gjeve løyve. Tilbygget vil heller ikkje utgjera ei vesentleg endring frå dagens situasjon, heiter det i vedtaket 19. juni, som vart gjort med tre røyster frå KrF, H og Frp mot dei to røystene til Ap og SV.

Vedtaket er i strid med tilrådinga frå fylkesrådmannen. Han tilrådde avslag og viste til at vegstellet hadde teke omsyn til krava til vegsystemet, trafikk og samfunnet elles, og at det ikkje var gjort sakshandsamingsfeil.

Lerøen ynskte eit tilbygg for å få meir funksjonell hytte med vatn og avløp. Tilbygget ligg 21 meter frå fylkesvegen. Byggjegrensa er 50 meter frå vegen. Den eksisterande hytta ligg nærare vegen enn tilbygget, og Lerøen meiner trafikktryggleik ikkje er relevant i saka.

Statens vegvesen avslo søknaden mellom anna for å hindra at tiltak langs vegen hindrar framføring av ein planlagd gang- og sykkelveg og plassering av planfrie kryssingar. Bygg så nær vegen som i dette tilfellet kan skapa utfordringar for drift og vedlikehald av vegen, særleg om vinteren. I tillegg ligg tilbygget i eit støyutsett område der bygging av fritidsbustader vert frårådd. Vegvesenet meinte at eit tilbygg med soverom, bad og kjøken truleg vil auka bruken av hytta og dermed også trafikken på fylkesveg 7.

I klagen peika Lerøen på at det i 2016 vart godkjent og opparbeidd fire parkeringsplassar like ved fylkesvegen og om lag tjue meter frå hennar tomt. Vegvesenet opplyser at det kommunale vedtaket ikkje har vore kjent, og at vegvesenet difor ikkje fekk uttala seg i saka. Fylkesrådmannen meiner trafikktryggleik er eit relevant moment i saka, men meiner det ikkje er avgjerande. Han meiner det er skilnad på eit tilbygg og den nemnde parkeringsplassen, som etter hans syn kan vera i strid med kommunedelplanen. Med tanke på vegdrift finst fleire tungvegande argument mot tilbygget, meiner han, men altså utan å få politisk gjennomslag.