Sluttar i bookingselskap
Dagleg leiar i Book Hardanger, Alexander Hillerich, har sagt opp stillinga si etter å ha leia selskapet sidan april 2023.
Hillerich vender no attende til forsvarsindustrien og tek over som vice president programs i forretningseininga «global business» hjå Rheinmetall AG, opplyser Hillerich i ei pressemelding.
Styreleiar Mona H. Hellesnes i Book Hardanger seier at styret har starta prosessen med å finne ein ny dagleg leiar, og håpar å ha ein etterfølgjar på plass før Hillerich går av ved årsskiftet.
– Saman med eit dyktig lag har me fått til mykje på kort tid. Sjølv om det framleis står att mange milepålar, går utviklinga etter planen. Med nyleg tilsett marknadssjef er organisasjonen komplett, og verksemda er klar for å gå over i neste fase der fokuset på direkte sal vert utvida til ei mykje tyngre satsing på onlinesal, e- handel og digital marknadsføring, opplyser Hillerich.
Book Hardanger vart etablert i 2022 av lokale reiselivsaktørar, Fjord Tours Group og kommunane Eidfjord og Ulvik. Målet er å auka verdiskapinga i reiselivsrelaterte verksemder gjennom kommersielt sal på digitale plattformer, produktutvikling og betring av transport- og mobilitetsløysingar. Selskapet har fire tilsette med kontor i Eidfjord.
Les også:
