Slutt for sommarskisenteret

Sommarskisenteret Fonna Glacier Ski Resort i Jondal vert lagt ned.

Driftsselskapet melde oppbod til Hordaland tingrett måndag.

I ei pressemelding skriv advokat Egil Horstad at Visitfonna AS i alle år frå 2018 har hatt negativt drifts- og årsresultat. Difor har selskapet trunge kapital- og likviditetstilførsel for å driva, reparera og investera i utstyr.

– Selskapet har gjort ei rekkje tiltak for å auka driftsinntektene, og har hatt eit mål om at det frå 2025 skal kunna oppnå positive driftsresultat, skriv han i pressemeldinga.

– Ikkje mogleg å rekna heim

Heisanlegget er frå midten av 1970-talet. Horstad seier til HF at det har vorte klart at senteret ikkje lenger kan drivast. Horstad estimerer at oppgraderinga vil kosta 30—40 millionar kroner. Ifylgje pressemeldinga er anlegget prega av alderen, og det vert ikkje lenger produsert delar til heisen. I tillegg måtte maskinparken ha vorte oppgradert med mellom anna nye trakkemaskiner.

– Det store investeringsbehovet er ikkje mogleg å rekna heim økonomisk. Ein skal aldri utelukka at det er ein sjeik som synest det er ein god idé å bruka pengar på dette, men ein slik kjenner ikkje me til, seier Horstad.

Han fortel at Meteva AS og eigar Trond Mohn har vore den klart største investoren dei siste åra.

– Om ein skulle ha oppgradert anlegget, ryk 2025-sesongen. Det skulle eigentleg vera ein sesong der senteret skulle koma seg og driva med positivt resultat. Det er ei så stor oppgradering at Meteva gjorde det klart at det ikkje vil vera med vidare, seier Horstad.

– Bresmeltinga byr på problem

Dei siste åra har isbreen krympa. Horstad opplyser at påstiginga til heisen smeltar vekk. Smeltinga kan utsetjast ved å produsera snø, men det er usikkert kor lenge det hjelper fordi smeltinga er meir omfattande enn ein fyrst trudde.

Det er kome fram samanhengande fjell mellom mast sju og fjellet på vestsida, noko som ifylgje pressemeldinga hindrar nedfarten og turist- og parkområdet. Horstad opplyser at heistraseen stadig vert endra på grunn av smelting, og at heile fjellryggar smeltar fram. Sidan breprofilen er i endring, er investeringa i ny heis usikker, opplyser Horstad.

På bakgrunn av bresmeltinga, og at det ikkje er sannsynleg å henta inn kapital, ser ikkje selskapet andre alternativ enn å avvikla drifta. Selskapet har arbeidd med panthavarane Sparebanken Vest og Innovasjon Norge for å avvikla drifta utan konkurs, men har ikkje lukkast, heiter det i pressemeldinga.

– Visitfonna AS orsakar sterkt at sommarskisenteret må avviklast, og dei konsekvensar det får for tilsette, kontraktspartar, kundar og lokalsamfunnet, står det i pressemeldinga.

Bygget der restauranten knytt til skisenteret ligg, er eigt av Folgefonna Velkomstsenter AS. Visitfonna AS eig aksjane i selskapet. Sidan Visitfonna er den største leigetakaren i bygget, vert leigeinntektene så reduserte at heller ikkje Folgefonna Velkomstsenter AS kan dekkja sine forpliktingar. Også dette selskapet melder difor oppbod måndag.