Slutt for Norheimsund trykkeri
I 2021 flytta Asle og Michelle Haugland heim til Kvam, og i januar 2022 kjøpte dei Norheimsund trykkeri AS i Steinsdalen. No vert det lagt ned.
Den store omsetninga har ikkje komme. No, nær to år seinare, har ekteparet bestemt seg for å legga ned drifta.
– Me kan ikkje forsvara å ha dei dyre maskinane ståande der lenger, seier Haugland.
Haugland synest det er synd at utfallet blei som det blei.
– Me visste jo på førehand at trenden i bransjen var på veg ned, men me trudde at me kunne snu den. Det gjekk ikkje.
Då paret tok over i 2022, gjorde dei det også for å bevara trykkeriet.
– Det var anten det eller at det blei lagt ned. Me følte vel litt på eit ansvar òg, sidan me kjende Anne Berit (tidlegare eigar, red. merknad), seier Haugland.
Han hadde eit håp om at andre kunne overta, men ingen har meldt interesse, fortel Haugland.
Det er ingen bestillingar som ligg på vent og ikkje vert leverte, og Haugland understrekar at arkivet til trykkeriet framleis vil vera tilgjengeleg.
– Det er berre å senda e-post til oss, så skal me hjelpe dei som treng det, lovar han.
I tillegg til at gevinsten ikkje har komme, har det vore slitsamt for ekteparet å driva trykkeriet.
Begge har jobb ved sida av, og har pendla mykje fram og tilbake til Stavanger.
– Eg har fått ei ny og litt krevjande stilling i Equinor. Det er rett og slett ikkje nok timar i døgnet til begge delar og til familien, seier Haugland.
No har paret flytta tilbake til Stavanger på heiltid.
