Slo saman krefter for naturvern
I februar vart Naturvernforbundet i Kvam ein del av historia. Måndag vart laget ein del av eit nytt, felles lokallag for kommunane i Hardanger.
Etter 36 år som eige lokallag er Naturvernforbundet i Kvam vorte ein del av Naturvernforbundet i Hardanger. Stiftingsmøtet var i Odda måndag. Det nye laget omfattar kommunane Eidfjord, Kvam, Ullensvang og Ulvik.
Før Naturvernforbundet i Kvam vart lagt ned, samarbeidde laget med fylkeslaget for å få til eit lokallag i Ullensvang. I prosessen vart det klart at det var meir tenleg med eit lag for heile Hardanger. Det går fram av møtereferatet frå årsmøtet til lokallaget i Kvam i februar.
Blanding og breidd
– Litt av målet var å blanda oss og å få litt breidd. Med representantar frå ulike område i Hardanger har me fått det til, seier Klaus Rasmussen frå Øystese.
Han vart vald som leiar for eitt år og som styrelem for to år. Rasmussen fortel at han har inntrykk av at både kvemmingane og lemene frå dei andre kommunane er nøgde med den nye ordninga.
Eit lokallag som er felles for alle Hardanger-kommunane, kan styrkja stemma til Naturvernforbundet, hevdar Rasmussen.
– Stemma har ikkje vore så tydeleg alle stader. Eg vil tru at me no kan stå saman og pressa politikarane til å tenkja annleis, seier han.
For Naturvernforbundet i Kvam har det vore naturleg å engasjera seg i det som skjer lenger inn i fjorden, fortel Rasmussen. No ligg alt til rette for at kvemmingane kan samarbeida med andre hardingar i ulike kampsaker
Det nye styret
Det nye lokallaget har 210 lemer. 15–20 av desse deltok på stiftingsmøtet, fortel Oddvar Soldal, som er ein av styrelemene.
Dei som vart valde inn i styret, i tillegg til Rasmussen og Soldal, er Elin Lervik frå Odda, Bård Kråkevik frå Jondal, Arjo Kvamme frå Lofthus, Christen Wintertun frå Odda, Leona Wunderlich frå Odda og Lars Helge Ljone frå Ulvik. Varalemer er Vigdis Nilsen frå Ulvik, Tore Bergum frå Grimo, Bas van der Wiel frå Vikøy, Tomas Seim frå Røldal og Signe Langesæter frå Grimo.
På stiftingsmøtet vart det vedteke to fråsegner som speglar nokre av sakene til lokallaget i Hardanger. I den eine tek lokallaget til orde for at kommunane må ta ansvar for forvalting av fjorden og villfisk gjennom ein interkommunal plan. I den andre seier lokallaget nei til gondolbane til Rossnos i Odda for å verna villreinen.
Om villrein heldt viltforvaltar Tor Punsvik føredrag i det fyrste opne møtet i regi av det nye lagt.
