Slit med spenning i Ålvik
Fleire klagar på spenningskvaliteten, ifylgje Kvam Energi Nett.
Kvam Energi Nett (KEN), som eig og driftar distribusjonsnettet i Ålvik, har over tid fått klagar på spenningskvaliteten i området. Det kjem fram i ei e-postveksling mellom KEN og Reguleringsmyndigheita for energi (RME). Nettselskapet meiner at problemet er knytt til støy frå anlegget til Elkem Bjølvefossen. Det stadfestar også målingane til Elkem, ifylgje KEN.
For å løysa situasjonen har KEN hatt møte med både Elkem og Statkraft, men utan å koma fram til ei løysing. I sommar tok KEN kontakt med RME for å spørja om råd. RME skriv at dersom det ikkje er mogeleg å overhalda grenseverdiane for spenningskvalitet, må den ansvarlege parten utbetra utan ugrunna opphald. Det seier leveringskvalitetsforskrifta, ifylgje senioringeniør Camilla Aabakken i RME.
Aaron James Miille er nettsjef i KEN. Han skriv til HF at verksemda mistenkjer at det framleis er utfordringar med støy i nettet i Ålvik.
– Årsaka til støyen er i så fall komplisert, og det vil truleg vere både omfattande og kostbart å utbetra. KEN har henta inn naudsynt informasjon og analysar, og ventar på ein ekstern rapport, skriv Miille.
Om rapporten syner at spenningskvaliteten er utanfor leveringskravet, vil KEN senda inn ein klage til RME, opplyser han.
