Slit med å få sjøhuset godkjent – meiner rådmannen har villeia

Hovden ynskjer den siste biten på plass på eigedomen i strandsona på Hammaren ved Kysnesstrand. Frå før finst ein tilkomeveg, ein molo og eit bygg med lager og husvære, pluss ein utsprengd liggjeplass til båten Hovden som nyttar til å frakta turistar gjennom næringsføretaket Hardanger Fjord AS. Alle desse tiltaka vart godkjende av Jondal kommune.

Den siste brikka i puslespelet er eit sjøhus på båtplassen, slik at båten – ein Princess på 50 fot – kan lagrast innandørs medan han flyt.

Kjernen i usemja mellom søkjaren og kommunen er måla på bygget. Då administrasjonen avslo dispensasjonssøknaden i februar, opplyste rådmannen at naustet har ei mønehøgd på 13,9 meter og at bruksarealet er nær 1.000 rutemeter. Det same opplyste han då saka vart send på høyring hjå Statsforvaltaren. Høyringa enda med ei negativ fråsegn og altså med avslag.

Hovden klaga på vedtaket. Klagen vart lagd fram for utval for samfunn, plan og næring 7. april, av di rådmannen meinte saka var prinspiell.

Usamde om høgd

Den gjeldande planen for området, kommuneplanen for gamle Jondal, opnar berre for naust med bruksareal på inntil 40 rutemeter og éi høgd.

Hovden meiner administrasjonen tolkar teikningane feil. Etter hans syn er naustet berre 8,8 meter høgt. Det grunngjev han med føringane i byggteknisk forskrift (TEK17), som tilseier at høgda skal målast frå gjennomsnittshøgda på terrenget kring naustet.

Ettersom det er ei høg skjering bak naustet etter sprenginga, skal ikkje målinga starta frå den støypte betongkaien kring båtplassen, men om lag halvvegs opp på sideveggene, meiner han. Og når høgda er feil, vert også arealreknestykka feil.

Dermed har kommunen villeia Statsforvaltaren og medverka til ei negativ fråsegn, hevdar han.

– På to ulike planetar

Synet til Hovden gjekk fram av saksframlegget til utvalet, der også målsette teikningar var vedlagde, men rådmannen heldt fast ved at høgda skal reknast frå betongkaien. Hovden forfekta difor synet sitt i straumpost til politikarane før det avgjerande møtet. Det hadde effekt. Utvalet gav samrøystes dispensasjon. I møtet vart målsetjinga eit sentralt tema.

– Eg vil gjerne vita kvifor det er nesten fem meter skilnad i utrekningane, sa Hildegunn Espe (Sp).

– Teikinga viser nøyaktig høgd, og målereglane er klare med gjennomsnittleg planert terreng rundt bygget. Mønehøgda er heilt rett. Dette kan jo me. Me veit korleis det skal vurderast, sa kommunalsjef for kultur, næring og samfunn, Kristian Bondhus-Jensen.

Han meiner det må vera klinkande klart at det ikkje er med slike «gigantiske bygg» ein byggjer ut i strandsona.

– Eg er litt skremt av skilnadene mellom administrasjonen og søkjaren. Dei er på to ulike planetar og heilt på kollisjonskurs. Det er veldig uheldig. Eg føler at administrasjonen er i forsvarsposisjon i måten ein argumenterer på, sa Inger Synnøve Vestrheim (H).

– Me er vane med, særleg i byggjesaker, at søkjarane ikkje er samde med oss. Me held oss til det som er søkt om. Det er det som ligg i bordet, sa Bondhus-Jensen.

Etter møtet har Hovden teke kontakt med Bondhus-Jensen for å korrigera oppfatningane av måla. Sistnemnde opplyser til HF at høgaste mønehøgd er 13,9 meter, medan høgda er lågare nærare terrenget i bakkant. Teikningane som viser dette, er sende til Statsforvaltaren, påpeikar han.

– Må vera stort

Finn Hagen (Frp) viste i utvalsmøtet til at båten til Hovden er 4,57 meter brei og 50 fot lang. Då strekkjer det ikkje til med eit vanleg naust, påpeika han.

Eivind Tokheim (V) sa at den følte høgda på bygget, sett frå landsida, ikkje vil vera stor og dominerande.

Vidar Solvi (Ap) meiner det er underleg å framheva at naustet har ei grunnflate på 280 rutemeter når bygget skal dekkja ei eksisterande grop og dermed ikkje bandlegg arealet.

Fleire understreka at søknaden er tilpassa. Høgda er redusert og eit husvære på toppen er droppa.

Ei lang historie

Det vart òg framheva at saka har versert lenge, og at søkjaren undervegs har retta seg etter råd frå Jondal kommune og Statsforvaltaren. Etter Solvi si meining burde søkjaren vore tildelt ein medalje for uthald. Espe meiner han har vist at han er villig til å tilpassa byggjetiltaket for å få det realisert.

– Den stakkars mannen har halde på i så mange år og fått så mange slag i trynet, uansett korleis han har snudd på det. Han har gjort det han kan, sa Hagen, som meiner tida er inne for å hjelpa Hovden med å få skikkelege, trygge tilhøve kring båten.

– Her har søkjar gjort alt rett. Me har eit moralsk ansvar for å sørgja for at det blir fullført, sa John Helge Rasmussen (Ap).

– Det er ikkje lenge sidan kommuneplanen vart vedteken. Han seier tydeleg at me skal satsa på turisme og at grunneigarar skal få søkja om å byggja naust i strandsona. Eg slit med at det fyrste me skal gjera, er å seia nei. Det er eit prisverdig tiltak og tilskot til reiselivet. Eg applauderer at nokon vil satsa og setja kommunen på kartet, sa Margreta Sandvin Eiken (Ap).

– Grov dispensasjon

Bondhus-Jensen sa at fleire fortalde ei historie han ikkje kjende att i det heile teke. Ullensvang kommune har tidlegare rådd søkjaren til å regulera området. Tiltaket er no utan bustad, men om lag like stort som før, og det er framleis snakk om ein «grov» dispensasjon, sa han.

– Eg trur ikkje at dette er til hjelp for dei som vil driva næringsutvikling i kommunen. Om ein hyllar at nokon er standhaftig og prøver om att, endar det truleg med eit nei. I ein reguleringsplan kan ein sjå på avbøtande tiltak og storleik, og så hadde ein kome i gang mykje fortare enn ved å køyra på med ein dispensasjon som Statsforvaltaren garantert klagar på, sa han.

Bondhus-Jensen viste til at omfanget av tiltaket ikkje var kjent då søkjaren fekk råd om å søkja om dispensasjon.

Vidar Solvi viste til at søkjaren måtte ha regulert eit større område enn berre den eine eigedomen. Espe sa at området er regulert til naust.

Det avviste Bondhus-Jensen, og viste til at området i gjeldande kommuneplan er avsett til friuluftsområde med opning for å byggja små naust.

Argumenterer for

Reidun Haugen Dalseth (KrF) sa at målet må vera å løysa saka og få tiltaket gjennom. Spørsmålet er om dispensasjonen er den rette vegen å gå, dersom det berre endar med avslag og endå meir tidsbruk, meiner ho.

Dispensasjon vart det altså likevel. I framlegget, som administrasjonen skreiv for utvalet, vert fylgjande moment framheva:

• Tiltaket svekkjer ikkje LNF-føremålet.

• Utbygginga i området har vore positiv for båt- og friluftsliv ved å opna for tilgang til sjøen.

• Intensjonen til Jondal kommune sidan 2007 har vore å godta naustet

• Med tanke på tryggleik og verdiane i båten vil det vera ein føremon å dekkja den utsprengde båtplassen med eit bygg.

• Bygget vil vera lite synleg frå land og i tråd med allereie utført utbygging.

• Vedtaket vil vera i tråd med intensjonane i den ferske samfunnsdelen av kommuneplanen.

Dei folkevalde kravde at det vert reist eit fint gjerde rundt naustet, slik at ingen ramlar ned den bratte skrenten bak bygget.

Nyleg kom klagen frå Statsforvaltaren på vedtaket: