Slik vil politikarar kvitta seg med pukkellaksen
Fleire elvar i Noreg har blitt invaderte av pukkellaks. No vil nærings- og fiskeriministeren gjera fisket etter laksen kommersielt i sjøen.
– Me har sagt det heile tida. Pukkellaksen er og kan bli ein stor ressurs, seier nestleiar i Vest-Finnmark kystfiskarlag Einar Juliussen til NRK Nordland. Pukkellaksen har allereie innteke store delar av Nord-Noreg, og forskarar seier dei trur han vil bevega seg sørover med tida. Regjeringa løyver no pengar i eit forsøk på å stansa spreiinga.
– For å lukkast med dette, må me òg utvikla eit treffsikkert fiske i sjø og avgrensa talet på fisk som går opp i elvane. Det er her Nærings- og fiskeridepartementet kan bidra, seier fiskeri- og havminister Bjørnar Skjæran (Ap).
Artikkelen held fram under annonsen.
Utfordringa er å gjera dette utan å påverka villaksbestanden.
Eirik Frøiland, seniorrådgivar i Miljødirektoratet, seier at pukkellaksen kan bli veldig talrik raskt. Det gjeld ikkje berre i norske elvar, men òg i andre land med kyst langs Atlanterhavet.
– Om bestanden aukar kan det gje mange negative konsekvensar for naturlege fiskebestandar, for økosystem i og langs vassdraga og for vasskvaliteten, seier Frøiland.
Pukkellaksen kan òg smitta fisk i oppdrettsanlegg. Miljødirektoratet vurderer no korleis ein kan ta ut fleire individ, utan at det fører til auka fangst av atlantisk laks, sjøaure og sjørøye.
(©NPK)
