Slik kan ein unngå ulukker på bryggja i vinter
Kulde og glatte kan føra til farlege situasjonar på bryggja. Ifølgje Kystverket har 28 personar dei siste fem åra mista livet etter at dei fall frå ei bryggje.
– Mange ventar med å ta på seg vesten til dei er om bord i båten. Me meiner at ein bør ta på vesten så tidleg som mogleg. Bruk av flyteutstyr kunne med stor sannsynlegheit redda fleire av dei som har omkome i denne type hamneulukker, seier sjøfartsdirektør Knut Arild Hareide i ei nyheitsmelding.
Når det blir glatt og isete på bryggja bør ein òg fjerna gjenstandar som ein kan snubla i, ha god belysing og ha leiderar som stikk djupt ned i vatnet, heiter det vidare.
Artikkelen held fram under annonsen.
– Dersom du er åleine og fell i sjøen på vintertid har du svært kort tid å redda deg sjølv før det blir ei alvorleg ulukke. Det er viktig at det er mogleg å koma seg raskt på land dersom ein er uheldig, seier kystdirektør Einar Vik Arset.
Sjølv om mange båthamner tek tryggleik på alvor, er det framleis for mange som manglar viktig tryggleiksutstyr.
(©NPK)
