Slik kan du sleppa drikkepresset

Kort samanfatta kan ein seia at det er bodskapen Guro Torpe og Kristine Hegreberg kringkastar i polkroken – kroken på Vinmonopolet – dagen før dagen før dagen før dagen før dagen. Fredag, skulle det verta.

Inga moralpreike

Dei to er ikkje der for å moralisera, forsikrar Torpe, som arbeider i avdeling for rus og psykisk helse i Kvam herad.

– Målet er å visa mange alkoholfrie alternativ. Mange er ikkje klar over at det finst så mykje godt på marknaden, og vert positivt overraska. Dei fleste trur det berre er Munkholm og dårleg raudvin som finst, seier ho.

– Dei smakar og seier: «Oi, det var jo godt. Eg må jo kjøpa!» Det hadde dei ikkje trudd, seier Hegreberg, til dagleg tilsett i flyktningtenesta i Nav Kvam.

– Ein del lurar på om det faktisk er alkoholfritt, sidan det er såpass godt, seier Torpe.

Kvam herad er ein såkalla Av-og-til-kommune. Standen i polkroken er eit av tiltaka for å bevisstgjera folk på eige alkoholforbruk. Bodskapen er ikkje eit forbod, men ei oppmoding om å hugsa at stundom – av og til – kan det vera like greitt å droppa alkoholen.

Ikkje minst gjeld det når ein skal til dømes køyra bil eller når born er til stades, utan at nett det vart noko stort tema på standen på polet.

– Folk er på farten, så me har ikkje mykje tid til å stå og snakka. Det vert meir å visa dei gode alternativa, seier Torpe.

I stor vekst

Den harde statistikken til Vinmonopolet, både lokalt og nasjonalt, talar sitt tydelege språk: Salet av ikkje minst alkoholhaldig sider, men også alkoholfri drikke er i stor vekst, medan salet av til dømes raudvin og brennevin går ned, fortel butikksjef Britt Ingvild Torvik ved polavdelinga i Norheimsund.

Frå i fjor til i år har salet av alkoholfri drikke auka med 16 prosent.

– Det er ikkje nok å ta inn nokre kassar med alkoholfritt. Det er ikkje ein liten krok lenger. Det har kome mange gode alternativ å velja mellom, seier Torvik, og understrekar at dei alkoholfrie variantane er laga på «skikkeleg» vis og difor kostar ein del sjølv utan alkoholavgifter.

– Kjem folk og spør etter alkoholfrie variantar?

– Ja, dei vil ha gode alternativ til spesifikke rettar. Me hjelper folk med drikke til mat når dei skal ha besøk, seier ho.

Torvik påpeikar at ein del kjenner på drikkepress og kanskje kvir seg for å gå på sosiale samkomer. Andre har familiemedlemer eller vener som ikkje kan drikka alkohol. Med dei gode alternativa kan ein enkelt sleppa unna brysame spørsmål om kvifor ein ikkje drikk.