Slik blir den nye kvardagen for frisørar

Kundane får ikkje bruke mobilen, og det kan bli aktuelt med munnbind for enkelte behandlingar. Dette er den nye arbeidskvardagen til frisørane og hudpleiarane.

Det kjem fram i smitteverntiltaka for frisør- og hudpleiebransjen. Frå måndag kan frisørsalongane opne igjen.

Kundar må vaske eller reingjere hendene med Antibac når dei kjem, og får ikkje bruke mobiltelefon i salongen.

– Mobil er ei mogleg smittekjelde og skal ikkje brukast når du er i salong, heiter det.

Det blir òg mellom anna oppmoda om å unngå kø og sørge for minst mogleg ventande kundar i lokalet.

Opne gradvis

Folkehelseinstituttet har i samarbeid med mellom anna Fagforbundet Frisørenes Fagforening og Norske Frisør- og Velværebedrifter (NFVB) utarbeidd smitteverntiltaka.

– Bransjen har til vanleg eit strengt hygienisk regelverk. No får vi eit smittevern i stort omfang som er nytt for oss. Salongane vil opne gradvis og kontrollert, seier leiar Anne Mari Halsan av NFVB i NHO Service og Handel.

Dei representerer 1.300 frisør- og hudpleiebedrifter.

Ikkje tilbake til normalen

Leiar Vivian Jacobsen i Fagforbundet Frisørenes fagforening er svært glad for at medlemmene hennar no kan komme tilbake i jobb. Samtidig ber ho om at både frisørar og kundar legg vekt på smittevern.

– Alle må ha forståing for at opninga av frisørsalongane ikkje betyr at vi er tilbake til normalen. Vi må ha ein forsiktig og kontrollert oppstart, seier fagforeiningsleiaren.

(©NPK)