Slepp ikkje unna oppgjer

Kvam herad yter to millionar kroner til underskotsdekning etter eit nytt skrint år i Hardangerbadet AS. Låge besøkstal i eit nytt koronaprega år førte til at selskapet ikkje var i stand til å betala «husleiga» til det kommunale føretaket Kvammabadet. Dermed måtte heradet for andre år på rad kasta ut ei livbøye i form av kroner.

Ingen i heradsstyret sette seg imot dette. Det som skilde partia, var kor stor livbøya skulle vera.

Går ikkje klar krav

Sp sine representantar ynskte i tillegg å gje kausjonistane – ei rekkje verksemder og privatpersonar – eitt års fritak frå å yta til saman ein million kroner i underskotsdekning. Gruppeleiar Jostein Ljones (Sp) argumenterte med at Kvam herad har god råd etter eit godt fjorår, i tillegg til at kausjonistane også som aksjonærar har ytt mykje til prosjektet og dimed til utvikling i Kvam. Ingen andre parti støtta framlegget.

– Eg trur kausjonistane vil ta ansvar uansett om det ikkje vert vedteke, sa Ljones.

Hans Arne Børsheim (KrF) meiner det ville vore feil å frita kausjonistane frå ansvaret deira. Delinga av ansvar mellom dei, Kvam herad og Hardangerbadet Eigedom AS er viktig, meiner han. Han påpeika at ansvaret til politikarane fyrst og fremst er å fremja interessene til innbyggjarane.

Samstundes opna han døra på glytt for å endra premissane for prosjektet som heradsstyret slutta seg til i 2017 ved å auka det kommunale tilskotet.

– Ingenting er hogt i stein, sa han.

Geir Madsen (SV) meiner ein ikkje år etter år kan ha ei så uføreseieleg drift. Det inneber truleg auka kommunalt innskot ut over dagens knappe million, spådde han.

– Ein tragedie

Natalia A. Golis (MDG) trekte fram skjeringspunktet mellom å ha vyar og ha kontroll. Ho ser for seg ei ny sak om kommunalt tilskot når ein ser korleis drifta utviklar seg med normale vilkår. Uansett ligg det største ansvaret for å ta grep på fleirtalskonstellasjonen – Ap, KrF, H og Frp – som styrer Kvam, meiner ho.

Håvard Gjerde (R) meiner anlegget må brukast meir og betre av Kvam herad.

– Det er ein tragedie at me har laga slike fasilitetar og har så lite bading for ungane, sa han.

Gjerde sa at hans parti slit med å forstå korleis forretningsmodellen for Hardangerbadet er bygd opp.

– Med 27 representantar er det ikkje berre dei smartaste som representerer folket, vedgjekk han.

– Tenk visjonært!

H ville gje Hardangerbadet meir stønad enn resten av heradsstyret, nærare bestemt 2,2 millionar kroner, for å betra likviditeten i selskapet. Pengane ville partiet henta frå driftsfond eller det store 2021-overskotet. I tillegg ynskte partiet å signalisera at rammene for skulebading må utvidast for å gje partane føreseielege vilkår.

Ottar Randa (H) gjekk i ordskiftet monaleg lenger. Han meiner dei folkevalde må tenkja langsiktig, strategisk og visjonært, minst ti–femten år fram i tid, og ta større ansvar for anlegget.

Han lanserte tankar om at Kvammabadet KF ikkje berre overtek drifta av anlegget, men også kjøper lokala i 2. høgd av Hardangerbadet Eigedom, etablerer eit felles, kommunalt legesenter for legane i Norheimsund og Øystese der, og i tillegg kjøper lokala til Helse i Hardanger AS i 3. høgd for å skapa eit stort helsehus som han trur vil vera meir eller mindre sjølvfinansierande. Og kanskje, sa han, vil Hardangerfjord Hotel ein dag byggja nytt på Evjo og dagens hotell verta del av helsehuset.

– Eg har ikkje sett på detaljar, økonomi og jus, presiserte han.

Frp ville nøya seg med å yta berre éin million kommunale kroner, på vilkår av at Hardangerbadet Eigedom AS yter like mykje. Då ville underskotet ha vorte dekt, men eigenkapitalen mindre styrkt. Om sistnemnde gjer det same, kan Kvam herad auka tilskotet med ein halv million kroner til, ifylgje framlegget. Ingen andre parti støtta det.