Slepp å be om konsesjon

Det har Noregs vassdrags- og energidirektorat (NVE) vedteke, med heimel i vassressurslova.

Føresetnaden er at tiltaket vert gjennomført i samsvar med framlagde planar og at det vert utført med minst mogleg ulempe for allmenne og private interesser i vassdraget.

Endra syn

NVE konkluderte fyrst med at tiltaket var konsesjonspliktig. Etter at Aarhus reviderte planane og mellom anna opplyste at han vil leggja ut grupper med stein til skjul for fisken, gjorde NVE om på avgjerda. Yngel og rogn vil ikkje verta råka av plastringa av elvesida, ifylgje Aarhus.

NVE har sendt saka på høyring til Kvam herad, Vestland fylkeskommune og Statsforvaltaren i Vestland. I tillegg har Norheimsund og Steinsdalen Grunneigarlag uttala seg.

Heradet er velvillig til tiltaket og etablering av vegetasjon med tanke på fisk, fugl og insekt langs elva. Ein har ikkje funne registreringar av truga artar i området.

Statsforvaltaren påpeikar at arbeidet i og langs vassdraget bør skje i perioden frå midten av juni og ut september, for å hindra skade på laks og sjøaure på stadium der dei ikkje kan flytta seg.

Arild Alvsåker i grunneigarlaget kom med fleire råd om korleis plastringa bør utførast. Det bør leggjast ut mindre grupper av stein med mellomrom langs heile plastringa, for å bryta opp det monotone særpreget slike plastringar ofte har, meiner han.

Må avklara ymse

NVE vurderer det slik at tiltaket, slik det no er planlagt, i langt større grad tek omsyn til fisk og biologisk mangfald. Direktoratet føreset at vegetasjonen som skal etablerast i toppen av hellinga, er tre og buskar. Dei vil vera med og armera og sikra elvekanten.

Vedtaket er ikkje eit løyve til bygging, presiserer NVE. Kvam herad må gje løyve etter plan- og bygningslova, og Statsforvaltaren etter lakse- og innlandsfisklova. Etaten ber òg Aarhus ta kontakt med Vestland fylkeskommune for å drøfta eventuelle kulturminneverdiar. Han må dessutan avklara tilhøva til dei eventuelle private interessene som vert råka.