Slår alarm om aktivitet i hyttefelt

Naturvernforbundet Hardanger har meldt kommunen for manglande oppfylging av reguleringsplanen for området. Forbundet oppmoda i haust Ullensvang kommune om snarast å inspisera området ved Heiane hyttefelt i Mælen, og vurdera om anleggsaktiviteten bryt med den vedtekne reguleringsplanen.

I ei bekymringsmelding til kommunen skreiv forbundet at området skulle vera eit hyttefelt med få inngrep, og at landskapstilpassing er ein viktig del av reguleringsplanen frå 1988. Aktiviteten i dag endrar inntrykket av området og kan ha påført landskapet varige sår, meiner Klaus Rasmussen i Naturvernforbundet Hardanger.

Bekymringsmeldinga vart send 22. november. Rasmussen purra 8. januar, men har ikkje fått svar.

Vil ha dialog

Naturvernforbundet har observert at det har føregått anleggsarbeid i området over tid, og reagerer på fyllingar, ein overdimensjonert parkeringsplass og halvferdige anleggsvegar, skriv leiaren til kommunen.

– Den siste tida har me observert ny aktivitet med anleggsmaskiner og hogst, og det er ført opp ein dominerande mur. Vidare er det hogd eiketre som ein fint kunne ha spart, og som er viktige element i landskapet.

Naturvernforbundet er interessert i dialog om saka, men viss Ullensvang kommune ikkje ynskjer å svara eller tek tak i saka, vil forbundet gå vidare til andre styresmakter, står det i e-posten.

Rasmussen hadde i slutten av februar framleis ikkje fått tilbakemelding på bekymringsmeldinga. Han seier til HF at det er krevjande å masa for å få til ein dialog.

– Å ta vare på naturverdiar eller vera kritisk til nedbygging er tydelegvis ikkje eit prioritert område i kommuneadministrasjonen, seier naturvernaren.

Sjå fleire bilete frå området her:

Kontakta politiet

9. mars vart Ullensvang kommune politimeld. I meldinga skriv forbundet til politiet at kommunen har plikt til å føra tilsyn. Naturområde er sprengde vekk eller endra, og arbeidet står ikkje i stil med føringane i reguleringsplanen, meiner Rasmussen.

Iselin Victoria Hammer, verksemdsleiar for byggjesak, kart og oppmåling, landbruk, havbruk og skogbruk, skreiv til HF dagen før at kommunen på grunn av kapasitet diverre ikkje alltid har høve til å halda meldarar kontinuerleg oppdaterte.

– Me har teke imot meldinga og starta oppfylging, skriv ho.

I same venda opplyste verksemdsleiaren at kommunen i eit brev 25. februar bad grunneigaren, Ullensvang Holding AS, om å koma med ei utgreiing innan 18. mars. Ullensvang kommune vil ta stilling til vidare arbeid etter det, skriv Hammer.

Ho opplyser at det er naturleg med ei synfaring i saka.

Då HF spurde rådmann Ole-Jørgen Jondahl om kva rutinane er for å svara innbyggjarar, organisasjonar og presse, sa han at sakshandsamaren som får spørsmål, skal svara så snart det er praktisk mogleg.

– Eg forventar at me svarar på spørsmål med det same. Om det krev sakshandsaming eller vidare vurdering, skal me uansett gje eit mellombels svar. Eg skal fylgja opp dette med byggjesak, sa Jondahl.

Konkurs

Dagleg leiar i Ullensvang Holding, Tore Eiken, seier til HF at det skal vera søkt om alt arbeid i området. Vidare viser han til arkitekt Alv Martin Vangdal, som er ansvarleg søkjar.

Vangdal opplyser at Hardanger maskin AS har hatt ansvaret for å gjera ferdig hyttefeltet, som vart påbyrja i 2015. Verksemda har fått godkjent veg opp til tomtene det no vert arbeidd med. Det er anleggsvegar som skal tilbakeførast til stiar, seier Vangdal.

– Planen er å laga veg og tilkome for vatn og avløp til tomtene.

– Og vegane skal tilbakeførast til stiar?

– Ja, det er det som står i søknaden, seier Vangdal.

Ullensvang Holding, som eig tomtene, er eit dotterselskap av Hardanger maskin AS, som melde oppbod i byrjinga av februar. Saka skal handsamast i Hordaland tingrett 25. mars.

Bustyrar Johannes Romstad opplyser at tomtene er tryggleik for eit pantelån, og den viktigaste eigendelen til Ullensvang Holding. Det må avklarast kva som skjer med tomtene før handsaminga av buet vert avslutta, fortel han.

Då verksemda melde oppbod, sa bustyraren at selskapet mest truleg vil opphøyra.

I 2017 tok HF opp med Jondal kommune at reguleringsplanen ikkje vart fylgd. HF omtala saka 7. februar 2017.