Skylift susar vidare med knapt fleirtal
Med 18 mot 15 røyster godtok kommunestyret aksjonæravtalen og konsekvensutgreiing av gondolbane frå Odda til Rossnos.
Gard Folkvord (Ap) mana til eit sterkt og breitt samarbeid mellom Ap og Sp som grunnlag for vidare arbeid med saka, og sa at han vona kommunesamanslåing ville føra til eit sterk fleirtal som ville lyfta næringsutviklinga.
Utsegnene enda med det motsette, i form av eit kommunestyre delt nesten på midten. Lajla-Margrethe Lindskog-Lund (Sp) avslutta debatten med å ta avstand frå karakteristikkane Skylift-skeptikarane vart til del undervegs i ordskiftet.
– Dei skapar ikkje godt samarbeidsklima, sa ho då ho etter eit gruppemøte gjorde kjent at Sp ville støtta framlegget frå Terje Kollbotn (R) om å ta saka opp att i samband med kommuneplanen.
Klassiske motpolar
15 støtta Kollbotn. 18 valde å verta aksjonær og satsa to 2,13 millionar kroner som skal gå til konsekvensutgreiing (KU) av tiltaket. Erlend Nævdal Bolstad (H) fekk støtte til eit tilleggsframlegg om at kommunestyret seinare skal godkjenna kva som skal vurderast i KU.
Han meiner elles at protestane mot tiltaket kjem altfor tidleg, sidan ein ikkje eingong har byrja greia dei ut.
I fleirtalet argumenterte ein for at gondolbanen kan verta eit trekkplaster og fyrtårn som kommunen treng. Mindretalet la vekt på mellom anna følgjene for naturen og at banen vil oppmoda til kvantitets- i staden for kvalitetsturisme. Dessutan vil skeptikarane sjå tiltaket i ein større samanheng i lys av kommuneplanen og utviklinga i reiselivet.
– Me har godt av ein timeout, sa Kollbotn.
Trist av motstand
Ordførar Roald Aga Haug (Ap) synest det er trist at så mange er mot aksjonæravtalen, sjølv om han forstår motstandarane. Han meiner ein må våga å satsa også i dårlege tider, og viste til at gjennomgangstrafikken er stor og folketalet fallande.
Dessutan minte han om at det kan vera viktig å vera samarbeidsvillig og deltakande i møte med interessentar. Fleire reiselivsorganisasjonar er for tiltaket, og det vil vera sterk kost å trassa dei, meiner han.
Folkvord viste til at verdskjende skidestinasjonar er bygde rundt gondolbanar.
– Me har snakka om gondolbane i fleire tiår. No har me eit gylle høve. Det skal me gripa. Å seia nei vil vera galskap, sa Vidar Solvi (Ap).
Emil Tomasgard (Ap) meiner ein må våga å utvikla og endra, til glede for etterkomarane.
Droppa utsetjing
Eit framlegg frå V om å utsetja saka til ein har hatt arbeidsmøte med grunneigarane og avklara grunnlaget for samarbeid og avtalar, fall med ni – dei fleste frå Sp – mot 24 røyster. Fleire påpeika at det er nettopp desse avklaringane ein skal få gjennom KU.
Vedtaket, i tråd med det rådmannen tilrådde, inneber at kommunen vert medeigar i Odda Skylift AS. Pengar til eigarposten vert henta i disposisjonsfondet.
Saka pryda framsida av Bergens Tidende onsdag. Avisa gjorde eit nummer av at banen vert den høgaste i Skandinavia. Oppslaget tyder på at prosjektet har tyngd og interesse, meiner Folkvord.
