Skulebadinga går sin gang
Tidlegare har skulebadinga vorte droppa når Hardangerbadet har vore stengt, men slik vert det ikkje denne gongen.
Torsdag må symjeanlegget i Øystese igjen stengja dørene, som fylgje av nasjonalt koronatiltak. Skulebadinga er derimot ikkje forboden. Leiar for barnehage og skule i Kvam herad, Inga Lill Jensen Tolo, opplyser at tilbodet held fram som normalt.
Det var ikkje tilfellet då Hardangerbadet var stengt tidlegare i vinter. Årsaka var at skulane var på såkalla raudt smittevernnivå. Det inneber ikkje i seg sjølv noko forbod mot skulebading, men Kvam herad har sjølv bestemt at det ikkje vert symjeundervising på raudt nivå. Om stenginga hadde vara lenge, måtte ein ha vurdert saka på nytt, opplyser Tolo.
Symjeopplæring inneber at tilsette må arbeida i andre kohortar. Dermed aukar smittefaren. Dessutan er det vanskeleg å ha nok personell, ikkje minst når ein del av undervisinga føregår på nett og ein del i fysisk format. Raudt nivå inneber dessutan bruk av buss for elevane ved Norheimsund skule, noko smittevernrettleiaren rår frå.
Rettleiaren rår frå også kroppsøving innandørs, men påpeikar at klor i bassengvatn set koronaviruset ut av spel. Ein må likevel organisera undervisinga slik at ein unngår nærkontakt mellom elevar i garderobane og bassenget. Heile kohorten kan ha undervising i lag så lenge ho føregår i lokale som ikkje høyrer til skulen.
Ein faktor i vurderinga til Kvam herad er at elevane i Kvam i utgangspunktet har mykje symjeundervising samanlikna med andre kommunar, opplyser Tolo. Kvam har alt i alt vore heldig og sloppe relativt billeg unna med tanke på stenging av bassenga, påpeikar ho.
